Álem boıynsha syrqattaný deńgeıi ósýde.
QR Premer-mınıstri Asqar Mamınniń tóraǵalyǵymen ótken Úkimet otyrysynda Densaýlyq saqtaý mınıstriniń mindetin atqarýshy Jandos Búrkitbaev sanıtarlyq-epıdemıologıalyq jaǵdaı týraly baıandama jasady, dep habarlaıdy Almaty-akshamy.kz Úkimettiń resmı saıtyna silteme jasap.
Álemde syrqattaný deńgeıi ósýde, onyń ishinde sońǵy aıda aýrý Eýropada 11% ósken, Tynyq muhıty óńirinde jáne Afrıkada 10% qurady.
Dúnıejúzilik densaýlyq saqtaý uıymynyń derekteri boıynsha, Eýropada sońǵy eki aptada 54 eldiń ishinde 18-inde syrqattanýshylyq ósken, onyń ishinde Ispanıada, Italıada – 97%, Danıada – 89%, Ulybrıtanıada, Portýgalıada – 69%, Fransıada –39% ósken.
«Qazaqstanda sońǵy eki aptada aýrýshańdyq 32% tómendedi. Qazaqstan Respýblıkasynda koronavırýs ınfeksıasy boıynsha epıdemıologıalyq jaǵdaı turaqty. Kún saıyn orta eseppen oń PTR testimen koronavırýs ınfeksıasynyń 500 jýyq jáne teris PTR testimen 50 jýyq jaǵdaıy tirkeledi», — dedi J. Búrkitbaev.
Epıdemıologıalyq jaǵdaıdy baǵalaý matrısasyna sáıkes, búgingi kúni Qazaqstan Respýblıkasynyń 15 óńiri «jasyl aımaqta» ornalasqan. Eki óńir – Soltústik Qazaqstan oblysy jáne Nur-Sultan qalasy «sary aımaqta». «Qyzyl aımaqta» turǵan óńir joq. Reprodýktıvti san – 0,95 quraıdy. Qyrkúıek aıynan bastap emdelip shyqqan adamdardyń sany naýqastardan 30% artqan.
Respýblıkada halyqty KVI-ge qarsy vaksınalaý jalǵasýda. Búgingi kúni birinshi komponentpen egilýge tıisti halyqtyń 78,6% egildi, ekinshi komponentpen 74,4% egildi. Epıdemıologıalyq jaǵdaıǵa áser etetin jaǵymsyz faktorlardyń biri – álemde «Omıkron» shtamynyń jyldam taralýy. 30 qarashadaǵy jaǵdaı boıynsha «Omıkron» 16 elde anyqtalsa, búgingi kúni aýrý álemniń 110 elinde anyqtaldy. Omıkronnyń taralý koefısıenti joǵary, ol 1:5 teń, qaıta juqtyrý qaýpi óte joǵary. Dúnıejúzilik densaýlyq saqtaý uıymynyń boljamy boıynsha, aýrý birneshe aı ishinde búkil álemge taralady.
«Dúnıejúzilik densaýlyq saqtaý uıymynyń derekteri boıynsha, COVID-19-ǵa qarsy vaksına salý sharasy tıimdiligin kórsetti. Sonymen qatar birqatar sheteldik zertteýlerdiń nátıjesine sáıkes, ekpe alǵan adamdarda ınfeksıadan qorǵaý 6 aıdan keıin orta eseppen 1,8 ese tómendeıdi. Qazirgi ýaqytta KVI boıynsha turaqty epıdemıologıalyq jaǵdaıdy saqtaý óte mańyzdy», — dedi Densaýlyq saqtaý mınıstriniń m. a. J. Búrkitbaev.
Qazirgi tańda 9,2 mln adam revaksınasıa jasatýy tıis, onyń ishinde 400 myńnan astam adam revaksınasıadan ótken.
Budan basqa, saýda-oıyn-saýyq ortalyqtaryna, saýda úılerine, sport ortalyqtary men fıtnes-ortalyqtarǵa, ıoga-ortalyqtaryna, karaoke, baseın, saýnalarǵa, monshalarǵa, «Qazposhta» bólimshelerine, Halyqqa qyzmet kórsetý ortalyqtaryna «Ashyq» qosymshasymen jasyl statýsy bar adamdardyń kirýine ruqsat berý jóninde qosymsha profılaktıka sharalaryn engizý usynylady. Osy normany 2022 jyldyń 5 qańtarynan bastap engizý usynylady.