Ózbekstannyń ulttyq sımfonıalyq orkestrine qazaq jigiti bas dırıjerlik etedi
Álibek Qabdyrahmanovtyń kórshi respýblıkanyń jetekshi mýzyka ujymyna basshylyq etkenine – 2 jyl. Qandasymyz Ózbekstanda týyp-ósip, otbasyn qurǵan. Jarymen eki bala tárbıelep otyr. «Atamekenim Qazaqstanǵa gastróldik sapar bola qalsa, qatty qýanamyn», - deıdi Álibek.
«Meniń ata-anam osy Tashkentte dúnıege keldi. Al ata-ájem Atyraý jaqtan kóship kelgen. Biz – Kishi júz, adaı rýynan taraǵan qazaqpyz. Otbasym qazaqy salt-dástúrdi ustanady. Anam men ájem qazaqsha sóılesse, menimen orys tilinde sóılesedi. Árıne, taza qazaq bolǵannan keıin ana tilimdi bilýim kerek, bul qateligimdi moıyndaımyn. Qazir qazaq tilin úırený kerek dep mindet qoıdym. Men óz isimdi súıemin. Bul – bedeldi jumys. Pandemıaǵa deıin jylyna 70 konsert beretinbiz. Shet memleketterge de jıi shyǵyp, aýqymdy sharalarǵa qatysyp turamyz. Ózbekstannyń basty orkestrin basqarý múmkindigin syılaǵany úshin memleketke alǵysymdy aıtamyn», - deıdi Ózbekstan ulttyq sımfonıalyq orkestriniń bas dırıjeri Álibek Qabdyrahmanov.
Ózbekstannyń ulttyq sımfonıalyq orkestriniń quramynda 80-ge jýyq mýzykant bar. Bas dırıjerdiń jetekshiligimen ujym talǵampaz tyńdaýshyny ónerimen tánti etip keledi. Ujymnyń repertýarynda klasıkalyq shyǵarmalardan basqa zamanaýı týyndylar, tipti qazaqtyń ulttyq kúıleri de bar eken.