2050 jylǵa qaraı G4 City qalasynda 2 mln asa adam turady.
Qonaev pen Almaty qalalarynyń arasynda boı kóteretin jańa shahardyń damýy qarqyndy. Jumys barysyn elordadaǵy esebinde Almaty oblysynyń ákimi Marat Sultanǵazıev bólisti, dep habarlaıdy almaty-akshamy.kz.
Ákimniń aıtýynsha, jańa qalada toqyma, bylǵary, qaǵaz buıymdaryn, qurylys materıaldaryn óndirý jáne logıstıkalyq jobalar júzege asyrylady. Josparly jumysqa 3,7 trln teńge kóleminde ınvestısıa tartý kózdelgen. Sátimen iske assa, jergilikti jerdegi 34 myńnan astam adam jumyspen qamtylatyn bolady.
– G4 City qalasynyń jobasy İle, Talǵar aýdandary men Qonaev qalasynyń aýmaǵyn qamtýy ınvestorlarǵa qolaısyzdyq týǵyzyp otyr. Sondyqtan Prezıdenttiń tapsyrmasyna oraı G4 City qalasyn jeke ákimshilik birlik retinde qurý boıynsha jumystar júrgizilip jatyr. Onyń aýmaǵy 88 myń gektardy quraıtyn 4 aımaqqa bólinedi, – dedi Almaty oblysynyń ákimi Marat Sultanǵazıev.
Saıajaı máselesin de ákim taıaýda sheshpekshi. Qazir Almaty oblysyndaǵy 674-ten astam saıajaıdyń 300-ine jyl sońyna deıin eldimeken statýsy beriledi. Aımaq basshysy «turǵyndar qajetti ınfraqurylymǵa qol jetkizý úshin birqatar áleýmettik nysandar boı kóteredi» dedi. Eń aldymen mektep, balabaqsha, aýrýhana men jol salynbaq. Kógildir otynmen qamtý isi de kún tártibinde tur.
– Saıajaı máselesi kóp jyldan beri sheshimin tappaı keledi. Sebebi, saıajaılar maýsymdyq sıpattaǵy úıler bolǵandyqtan ınfraqurylym jetpegen. Búginde 674 saıajaı bar. Onda 188 myń adam turady. Saıajaıdyń eldimeken mártebesi bolmaǵandyqtan eshqandaı ınfraqurylym joq, – dedi Marat Sultanǵazıev.