Almatyda jańa perınataldyq ortalyq salynyp, 4 medısınalyq mekeme jóndeledi
2023 jylǵa arnalǵan densaýlyq saqtaý salasynyń búdjeti 1,2 mlrd teńgege ulǵaıtyldy. Qarajat qoldanystaǵy medısınalyq mekemelerdi jóndeýge jáne jańalaryn salýǵa baǵyttalady, bul týraly máslıhattyń kezekten tys XI sesıasynda qarjy basqarmasynyń basshysy Qanat Sýhambekov málimdedi.
«Uzaq ýaqyt ishinde alǵash ret 4 densaýlyq saqtaý nysany kúrdeli jóndeýden ótedi. Buǵan búdjetten 600 mln teńge bólý qajet», – dep atap ótti Qanat Sýhambekov.
Qazirgi ýaqytta Qarasý sh/a otbasylyq-dárigerlik ambýlatorıanyń qurylysy aıaqtalýda. Ol paıdalanýǵa berilse Alataý aýdanynda turatyn 5 myńǵa jýyq adamdy alǵashqy medısınalyq kómek kórsetýmen qamtylatyn bolady.
Sonymen qatar, Daraboz sh/a 200 tósektik perınataldy ortalyq salý jáne Begalın kóshesindegi «Januıa» arnaıy kesheniniń ǵımaratyna qosalqy nysan salý josparlanǵan.