Aqtaý qalasynda №10 orta mektep oqýshylarynyń ata-analary bilim oshaǵynda qandala paıda boldy dep shaǵymdandy. Biraq mektep basshylyǵy ata-analardyń aryzyn joqqa shyǵardy.
№10 orta mektep oqýshylarynyń ata-analarynyń basty bas aýrýyna aınalǵan máselesi – jándikterdiń balalardy sabaq kezinde shaǵýy. Mundaı aqparat áleýmettik jelilerde tarap jatyr.
“Kóptegen oqýshyny shaǵyp tastaǵan. Birinshi synyp oqýshysynyń qaltasynan qandala tabyldy. Al mektep dırektory kerisinshe, qandala joq dep des berer emes. Keıin sózinen tanyp, qazirdiń ózinde dezınfeksıa bolǵanyn jáne bári tazalanǵanyn aıta bastady, biraq jaǵdaı ózgermegen. Balalardy jándikter áli de talap jatyr. Biz mektepte barlyq qabattar boıynsha qalypty zalalsyzdandyrý sharasyn júrgizýdi jáne dırektordy aýystyrýdy talap etemiz”, - deıdi ata-analardyń biri.
Bul jaǵdaıǵa Aqtaý qalasynyń bilim bólimi túsinikteme berdi.
“Ata-analardyń mektepte qandalany anyqtaýǵa qatysty suraýyna jaýap retinde mynany habarlaımyz. Ǵımaratqa muqıat tekserý, sondaı-aq oqytýshylarmen áńgime júrgizildi. Jándikterdiń shaǵýy jaǵdaılary anyqtalmaǵan. Mektepte turaqty profılaktıkalyq dezınfeksıalyq is-sharalar ýaqytynda ótkiziledi. Sońǵysy 3 qarashada, ekinshi toqsannyń bastalýyna deıin ótti. Alaıda ata-analardyń alańdaýshylyǵyn eskere otyryp, mektep basshylyǵy qosymsha dezınfeksıa júrgizý týraly ótinishpen sanıtarlyq - epıdemıologıalyq qyzmetke júginý týraly sheshim qabyldady”,- dep habarlady Aqtaý qalalyq bilim bóliminiń baspasóz qyzmeti.