5 qyrkúıekten bastap bir jylǵa saqtandyrý múmkindigi paıda bolǵan edi. Saqtandyrý statýsyn berýdiń jańa mehanızmi MÁMS júıesindegi kópshilik kútken jáne tıimdi ózgeristerdiń birine aınaldy. Búgingi kúnge deıin 2,6 myńnan astam azamat jańa tetikti paıdalanyp úlgerdi, dep habarlaıdy Almaty-akshamy.kz MSQ Almaty fılıalynyń baspasóz qyzmetine silteme jasap.
Habarlamaǵa súıensek, 2022 jyldyń qyrkúıeginen bastap mindetti áleýmettik medısınalyq saqtandyrý júıesinde ózin-ózi jumyspen qamtyǵan azamattardy saqtandyrý tártibi ózgerdi. Budan bylaı atalǵan sanattaǵy turǵyndar aldaǵy 12 aıǵa jarna tólep saqtandyrý júıesine qosylýǵa múmkindik aldy. Máselen, pasıent MÁMS paketindegi qyzmetterdi paıdalaný úshin ótken jyldyń bereshegin ótemeı, 2022 jyldyń qyrkúıek aıynan bastap 2023 jyldyń qyrkúıegine deıin jarna aýdara alady. Statýs 3 kúnnen keıin beriledi, sebebi ekinshi deńgeıli bankter tólemderdi 3 kún óńdeıdi.
Burynǵy tártip boıynsha, saqtandyrý statýsyna ıe bolý úshin, ótken 12 aıdyń qaryzyn óteý qajet bolatyn. Jańa mehanızm 5 qyrkúıekten bastap tolyqqandy iske qosyldy. Sarapshylar boljamynsha, bul ádis saqtandyrylmaǵan azamattardyń shamamen 30 prosentin saqtandyrýmen qamtýǵa múmkindik bermek.
Qazan aıynyń alǵashqy jartysynda elimiz boıynsha jańa mehanızmdi 2600-den astam azamat paıdalanǵan. Olardyń basym bóligi - Almaty, Astana qalalary jáne Almaty, Qaraǵandy, Túrkistan, Jambyl oblysynyń turǵyndary.
«Jalpy, saqtandyrý júıesi kópshilik úshin tıimdiligin dáleldep otyr. Óıtkeni, saqtandyrylǵan adam medısınalyq qyzmetti kereginshe paıdalana alady. Máselen, óz betinshe saqtandyrylatyn azamattar bir jylda 36 myń teńge tóleıdi. Biraq kórsetiletin qyzmet sany men kólemi bul qarajatpen shektelmeıdi», - deıdi MSQ Almaty fılıalynyń dırektory Tileýhan Ábildaev.
Bir jylǵa saqtandyrý statýsyn alý úshin ne isteý kerek?
Ózin-ózi saqtandyratyn azamattardyń aı saıynǵy jarnasy bıyldan bastap 3000 teńgeni quraıdy. Bul – eń tómengi jalaqynyń (ETJ) 5 prosenti. Mysaly, osy aıda saqtandyrý statýsyn alý úshin qazan aıynan bastap keler jyldyń qazanyna deıingi aralyq úshin jarna tólenýi tıis. Ár aıdyń jarnasy jeke-jeke tólenedi. Taǵy bir eskeretin jaıt, 12 aıdyń jarnasyn bir tólemmen aýdarýǵa bolmaıdy. Sebebi júıe ár aıdy bólek esepteıdi.
Jarnany kez kelgen ekinshi deńgeıdegi bank, bankterdiń mobıldi qosymshalary, tólem termınaldary men «Qazposhta» AQ fılıaldary arqyly tóleýge bolady.
Mártebe qashan paıda bolady?
Eger MÁMS júıesindegi medısınalyq qyzmetterdi osy aıdan bastap paıdalaný úshin jarna aǵymdaǵy aıdan bastap 12 aıǵa tólenedi. Sebebi «Mindetti áleýmettik medısınalyq saqtandyrý týraly» zańnyń 30-baby, 7-tarmaǵyna sáıkes, júıege qosylyp, saqtandyrý mártebesin alý úshin, aldyńǵy nemese sońǵy 12 aı úshin jarna tólengen bolýy shart.
Mysal: siz qazan aıynda jarnalardy 2022 jyldyń qazanynan 2023 jyldyń qyrkúıegine deıin tóleısiz. Saqtandyrý mártebesi qazan aıynda beriledi jáne siz aldaǵy bir jylǵa statýs alasyz. Sonymen qatar, keıin jarna tólenbeı qalǵan jaǵdaıda saqtandyrylǵan azamattardyń statýsy sońǵy tólemnen keıin taǵy 3 aı boıy saqtalady. Biraq bul bereshekti óteý mindetinen bosatpaıdy. Jarna tólenbegen jaǵdaıda tórtinshi aıdan bastap azamat saqtandyrý statýsyn joǵaltady.
Eger medısınalyq kómekke aldaǵy aıdan bastap júginbek bolsańyz, jarnany aldaǵy aıdan bastap tóleı alasyz. Tólemder úsh kún óńdeledi.
MÁMS qandaı múmkindikter beredi?
Saqtandyrylǵan azamattar MÁMS paketine kiretin medısınalyq kómektiń barlyq túrlerin paıdalana alady. Oǵan salalyq dárigerlerdiń konsýltasıasy, túrli analızder men dıagnostıkalyq tekserýler (rentgen, ÝZI, KT, MRT jáne t.b.), aýrýhanaǵa jatyp josparly em alý, medısınalyq ońaltý, joǵary tehnologıalyq medısınalyq kómek, skrınıngter kiredi.
Statýsty qalaı tekseremiz?
Tólemderge qatysty barlyq málimetti Qordyń fms.kz resmı saıty, Qoldau 24/7 mobıldi qosymshasy nemese Telegram arnasyndaǵy SaqtandyrýBot arqyly alýǵa bolady.