Olardyń kóbi telefon, shpargalka qoldaný sıaqty áreketterimen ereje buzǵan.
Magıstratýǵa túsýden úmitker 265 adamnyń test nátıjesi joıyldy, dep habarlaıdy Almaty-akshamy.kz QR Ǵylym jáne joǵary bilim mınıstrliginiń baspasóz qyzmetine silteme jasap.
Testileý nátıjelerimen kelispegen jaǵdaıda onlaın-apellásıaǵa berýge bolady. Apelásıaǵa testileý aıaqtalǵannan keıin 30 mınýt ishinde ótinish beriledi, ótinish bes kún ishinde qaralady.
Ulttyq testileý ortalyǵy Magıstratýraǵa túsýge arnalǵan keshendi testileýdiń aralyq qorytyndysyn jarıalady.
Ortalyqtyń habarlaýynsha, testileý bastalǵaly 35 myńǵa jýyq adam magıstratýraǵa túsý úshin emtıhan tapsyryp, olardyń 45%-ǵa jýyǵy shekti bal jınaǵan. Ortasha kórsetkish – 72 bal. Bir qatysýshy maksımaldy 150 baldyń 140-yn jınaǵan.
«Testileý bastalǵaly 265 qatysýshynyń nátıjesi joıyldy. Onyń ishinde 144 oqýǵa túsýshi smartfon, shpargalka jáne basqa da tyıym salynǵan zattardy alyp ótýge tyrysqany úshin test tapsyrý múmkindiginen aıyryldy. Keshendi testileý kezinde erejelerdi buzǵany úshin aýdıtorıadan 117 adam shyǵarylyp, olardyń nátıjeleri joıyldy. Sonymen qatar postproktorıng qorytyndysy boıynsha 4 adamnyń nátıjesi joıyldy. Olar emtıhan materıaldaryn sýretke túsirip, aýdıtorıadan alyp shyǵýǵa tyrysqan», - dep jazylǵan habarlamada.
Ulttyq biryńǵaı testileýdegi sekildi Keshendi testileýge kirgizý úsh deńgeıli júıe boıynsha júzege asyrylatyny belgili. Face ID jeke basyn sáıkestendirý arqyly, jeke kýálik boıynsha, sondaı-aq otyrǵyzý ornynda jeke basyn sáıkestendirý júrgiziledi.
«Testileýdiń birinshi aptasynda kirgizý kezinde 4 bógde tulǵa anyqtaldy. Iaǵnı, qatysýshylar ózderiniń ornyna basqa adamdy jiberip, testileýden ótpek bolǵan. Tıisti sharalar qabyldandy. Keshendi testileýdiń ekinshi aptasynda bundaı ereje buzýshylyqtar anyqtalǵan joq»,- delingen UTO habarlamasynda.
Osy aptada azamattyq emes joǵarǵy oqý oryndary, atap aıtsaq Joǵarǵy Sot janyndaǵy Sot tóreligi akademıasy, QR BP janyndaǵy Quqyq qorǵaý organdary akademıasy, QR İİM akademıasy, QR TJM M. Ǵabdýllın atyndaǵy azamattyq qorǵaý akademıasyna túsýge tirkelý aıaqtalǵan. Osy sanattaǵy oqýǵa túsýshiler úshin shet tilinen túsý emtıhany 6 tamyzda ótedi.
Aıta ketsek, bıyl magıstratýraǵa 13 myńnan astam grant bólingen. Keshendi testileý 20-shildede bastaldy, 10 tamyzda aıaqtalady.