Balalardyń qaýipsizdigin qamtamasyz etý máselesi – memlekettiń asa mańyzdy mindetteriniń biri
Ata-ana mekteptegi balasynyń jaǵdaıy men qaýipsizdigi úshin alańdamaýy qajet. Bul týraly Premer-Mınıstr Álıhan Smaıylov aıtty, dep habarlaıdy QazAqparat tilshisi.
«Balalardyń qaýipsizdigin qamtamasyz etý máselesi – memlekettiń asa mańyzdy mindetteriniń biri. Ata-ana mekteptegi balasynyń jaǵdaıy men qaýipsizdigi úshin alańdamaýy qajet. Bul baǵytta normatıvtik te, uıymdastyrý jaǵynan da barlyq deńgeıde júıeli sharalar qabyldanýda. Memleket basshysynyń tapsyrmasyna sáıkes Balalardy qorǵaý jónindegi keshendi jospardyń jobasy ázirlendi. Bilim berý uıymdaryn dabyl batyrmalarymen jáne beınebaqylaý júıelerimen jabdyqtaýǵa, olardy polısıa bólimshelerine qosýǵa, lısenzıalanǵan kúzetpen qamtamasyz etýge qoıylatyn talaptar kúsheıtildi», - dedi Álıhan Smaıylov Úkimet otyrysynda.
Onyń atap ótýinshe, bilim berý uıymdarynda qaýipsizdik talaptarynyń saqtalýyna turaqty túrde monıtorıń júrgizilýi tıis.
«Atqarylǵan sharalarǵa qaramastan, óńirlerde problemalar áli de jetkilikti. Beınebaqylaý ornatylǵan mektepterdiń arasynda kameralary standarttar men tehnıkalyq talaptarǵa sáıkes kelmeıtin mektepter de bar. Elimizdegi 1100-ge jýyq mektep polısıanyń jedel basqarý ortalyqtaryna qosylmaǵan. Baqylaý rejımi qatań saqtalmaıdy», - dedi ol.
Úkimet basshysynyń dereginshe, Túrkistan jáne Soltústik Qazaqstan oblystaryndaǵy mektepterde lısenzıalanǵan kúzet qyzmetterimen kelisimder jasalmaǵan.
«Kúzetke kóbinese arnaıy daıarlyqtan ótpegen adamdar tartylady. Osy máselelerdiń barlyǵyn sheshý kerek. Óıtkeni bul – balalarymyzdyń qaýipsizdigi», - dedi Álıhan Smaıylov.