Prezıdent reformalary: aıtyldy – jasaldy
Sıfrlandyrý – bul jaılylyq pen keń múmkindikter beretin zamanaýı álemniń ıgiligi bolsa da, munda da alaıaqtarmen betpe-bet kelý múmkin ekenin qaperde ustaǵan jón. Aqparattyq tehnologıalardy keńinen engizý kıberqylmys sanynyń kóbeıýine ákeldi. İshki ister mınıstrliginiń málimetinshe, bıylǵy jyldyń basynan beri quqyq qorǵaý organdary osyndaı 1,5 myń quqyq buzýshylyqty tirkegen.
Alaıaqtardyń quryǵyna qalaı túspeýge bolady?
Qalaı bolsa da, kúmándi siltemelerge jolamańyz jáne sizben baılanysqan adam ózin quqyq qorǵaý organynyń qyzmetkeri nemese bank qyzmetkeri retinde tanystyrsa da, jeke derekterińizdi eshkimmen bólispeńiz. Sonymen qatar, Qazaqstanda tirkelmegen nemese aýystyrylǵan abonenttik nómirlerden keletin qońyraýlardy buǵattaıtyn antıfrod-júıe qazirdiń ózinde qoldanyla bastady. Bul İshki ister jáne Sıfrlyq damý mınıstrlikteriniń birlesken jumysynyń arqasynda múmkin boldy.
«Antıfrod» abonenttik qońyraýlar týraly aqparatty óńdeý arqyly alaıaqtardyń qońyraýlaryn buǵattaıdy. Arnaıy biryńǵaı júıeniń kómegimen baılanys operatory nómirdiń belsendiligi týraly derekterdi suraıdy jáne olardy avtomatty rejımde taldaıdy. Eger júıe qońyraýdyń shynaıy ekenin jáne nómirdiń jalǵan emes ekenin rastasa, qaýipsiz baılanys ornatylady.
Baılanys operatorlarynyń málimetinshe, 2022 jyly júıeni biriktirgennen keıin 19 mln-nan astam alaıaqtyq qońyraýlar buǵattaldy, al bıylǵy eki aıda osyndaı 8 mıllıon qońyraýǵa tosqaýyl qoıyldy. Búginde uıaly baılanys operatorlary mundaı jaǵdaılardy tolyǵymen joıý úshin algorıtmderdi jetildirýde.