Baǵa nege ósti
Jylytý maýsymy qarsańynda kómir taǵy 7 prosentke qymbattady, dep habarlaıdy Almaty-akshamy.kz Habar 24 silteme jasap.
Energetıka vıse-mınıstri Jandos Nurmaǵanbetov osylaı dedi. Baǵanyń ósýine ne áser etti?
"Qazaqstan temir joly" jelisi arqyly kómir eksporty 12%-ke ósti. Sóıtip, 7 aıda elimiz 20 mln tonnaǵa jýyq qatty otyndy shekara asyrdy. Onyń deni Reseı, Ortalyq Azıa jáne Eýropa elderine baǵyttalǵan. Kómirdi el ishinde tasymaldaý 1,5 prosentke artqan.
Onyń 37 mln tonnasy JEO-na, 5 mln tonnadan astamy halyqqa jóneltildi. Bul byltyrǵydan 26 prosentke kóp. Jalpy alǵanda ulttyq kompanıa jelileri arqyly 62 mln tonna kómir tasymaldanǵan.
Iaǵnı ótken jyldyń sáıkes kezeńimen salystyrǵanda 4,6%-ke artyq. Ekonomıka úshin aýyz toltyryp aıtarlyqtaı kórsetkish, biraq qarapaıym halyqqa kómir baǵasy qoljetimdi emes.
Energetıka vıse-mınıstri Jandos Nurmaǵanbetovtiń sózinshe, temir joldar boıynsha otyndy jetkizý jyl basynan beri, ortasha alǵanda, 5%-ke qymbattapty.
Bıyl elde kómir quny 30 prosentke ósken. Tamyzdyń basynda ǵana baǵa 7%-ke kóterildi. Onyń ústine energıa óndirýshi kásiporyndardyń keıbiri shekti tarıfti taǵy da ósirýdi suraýda. Bul da baǵaǵa yqpal eteri haq.
Indýstrıa jáne ınfraqurylymdyq damý mınıstrligi áleýmettik kómirdi arttyrý arqyly máseleni retteýge ýáde berdi. Jalpy elde jylytý maýsymyna daıyndyq erte bastaldy. Qoımalarǵa 7 prosentke kóp kómir jınalǵan.
Ónimniń 10 prosenti bırjaǵa shyǵarylady. Keleshekte onyń úlesin 50 prosentke jetkizý kózdeledi. Bul deldaldardyń aralasýyn tejeıtin bastama deıdi mamandar.
«Qazir bizdiń mınıstrlik prıkaz jasap jatyrmyz. Iaǵnı avtomobıldik transportqa shekteý. Iaǵnı áleýmettik kómirdiń basqa elge shyqpas úshin. Biz aldyn ala ulttyq kásipkerlik palatasymen kelisip jatyrmyz. Iaǵnı bul bızneske nuqsan kele me, kelmeı me jalpy? Iaǵnı osy kómir shyǵaratyn, tasıtyn kásiporyndarǵa kesiri tımeý kerek. Atqarylyp jatqan jumystar osy. Biz múmkindiginshe búgin usynysty kóp jasap jatyrmyz. Iaǵnı sol ýaqytta kóp kólemde, qoımalarda kómir bolatyn bolsa, onyń baǵasy óspeıdi degenge keltiredi»,- deıdi IIDM Indýstrıalyq damý komıteti tóraǵasynyń orynbasary Turar Jolmaǵambetov.