Memleket basshysynyń «Ákimderdiń halyqpen kezdesýlerin ótkizý týraly» Jarlyǵyna sáıkes, keshe Almaty qalasy Naýryzbaı aýdanynyń ákimi Sanjar Toǵaı aýdan turǵyndarymen kezdesti.
Kezdesý barysynda aýdan ákimi aýdanda atqarylǵan jumystar týraly esep berdi.
- 2021 jyly Naýryzbaı aýdanyna quıylǵan ınvestısıa 126 mlrd teńgeni qurady;
- Shaǵyn jáne orta bıznes sýbektileri 11108 dana boldy;
- Memlekettik baǵdarlama negizinde 179 sýbektige 897,1 mlrd teńge kóleminde kómek kórsetildi;
- «Bıznestiń jol kartasy – 2025» baǵdarlamasynyń negizinde 150 joba, «Eńbek 2017–2021 jyldary» 13 joba iske asyrylyp jatyr;
- 3300 jańa jumys orny quryldy;
- Aýdan kósheleriniń 85%, ıaǵnı 348 kóshe asfálttalǵan; • 2021 jyly jalpy esepte 150 kóshege shuńqyrlardy jamaý jumystary júrgizilgen;
- 18 sport alańy, balalarǵa arnalǵan 16 oıyn alańy quryldy. Sondaı-aq, Sanjar Ádiluly aldaǵy ýaqytta atqarylatyn jobalar tizimin de aıtyp ótti. Jaqyn arada oryndalatyn jumystardyń qataryna 150 myń adamdy sýmen qamtıtyn «Aqsaı» sý stansıasynyń, memlekettik baǵdarlama negizinde 6 mektep salýdyń jáne ózge de ınfraqurylymdyq jobalardyń kirgeni aıtyldy.
Qysqasha baıandamadan keıin aýdan ákimi turǵyndardy tolǵandyratyn suraqtarǵa jaýap berdi. Turǵyndar tarapynan sý jetispeýshiligine, káriz qubyrlarynyń bolmaýyna, qaýipsizdikke baılanysty jáne ózge de ózekti máseleler boıynsha suraqtar qoıyldy. Aýdan ákimi aıtylǵan suraqtardyń basym bóligine jıyn basynda jaýap berip, keıbir máselelerdi jeke qaraýyna alatynyn eskertti.
Aıta ketken jón, el Prezıdentiniń tapsyrmasyn iske asyrý barysynda Naýryzbaı aýdanynyń ákimi S.Toǵaı 5 ret kóshpeli kezdesý jáne 27 qabyldaý ótkizdi. Oǵan barlyǵy 691 adam qatysyp, 252 suraqqa jaýap berildi. Onyń ishinde 72 másele sheshimin tapty, 87-sine túsinikteme berildi jáne 93 másele qaralý ústinde.