Jasyl Almaty baǵdarlamasy boıynsha aýdan ákimdigi qalalyqtarmen birge 5,5 myń aǵash otyrǵyzdy
Osy kúzde Almaly aýdanynyń turǵyndary ataýly aǵashtar otyrǵyzdy. Kógaldandyrý boıynsha keshendi jumystar týraly Óńirlik komýnıkasıalar qyzmetiniń baspasóz konferensıasy barysynda aýdan ákimi Erjan Seıtenov aıtyp berdi, dep habarlaıdy Almaty-akshamy.kz
Onyń aıtýynsha, jasyl jelekterdi otyrǵyzý turaqty tájirıbege engen. Jasyl Almaty baǵdarlamasy boıynsha aýdan ákimdigi qalalyqtarmen birge 5,5 myń aǵash otyrǵyzǵan.
Árbir kóshetke ony otyrǵyzǵan turǵynnyń aty jazylǵan jeke taqtaısha bekitilgen. Endi ár aǵashtyń óz «ıesi» bolady, onyń mindeti – aǵashtyń ýaqtyly kútimin baqylaý. E. Seıtenov almatylyqtarǵa megapolısti kógaldandyrýǵa atsalysqandary úshin alǵysyn bildirdi.
Otyrǵyzýdan basqa, aýdanda aǵashtardyń qýraǵan jáne qaýip tóndirip turǵan butaqtaryn kesý arqyly qaýipsizdikti qamtamasyz etý boıynsha aldyn alý sharalary júrgizilýde. Bıyl 7 myńnan astam aǵashty sanıtarlyq jáne formalyq kesý jáne 300 apatty aǵashty qulatý jumystary júrgizildi.
Apatty aǵashtardy qulatý kezinde «jasyl komısıa» qurylyp, onyń quramyna qoǵam belsendileri men sala mamandary kirdi. Árbir qaýip tóndirip turǵan aǵash aldyn ala muqıat tekserilip, sodan keıin ǵana ony kesý týraly sheshim qabyldandy.
E. Seıtenovtiń aıtýynsha, bıyl Almaly aýdanynda 6 970 sharshy metr alańǵa gúl kóshetteri otyrǵyzylyp, Nazarbaev dańǵyly, Abylaı han, Naýryzbaı batyr, Jibek joly kósheleri boıyndaǵy jaıaý júrginshilerge arnalǵan 7 myń sharshy metr ýchaskege gazon egildi.
Sondaı-aq, Muqanov-Bógenbaı batyr qıylysynda TJD qutqarýshylaryna arnalǵan jańa taqyryptyq saıabaq ashyldy. Aýdan mesenattarynyń esebinen Máýlenov, Shevchenko jáne Qurmanǵazy kósheleriniń aralyǵyndaǵy bóligi ózgerdi. Onda 2 760 kópjyldyq ósimdikterden túrli jasyl kompozısıalar otyrǵyzylyp, avtomatty sýarý júıesi ornatyldy.