Bul týraly Óńirlik komýnıkasıalar qyzmetiniń baspasóz konferensıasy barysynda Almaly aýdanynyń ákimi Erjan Seıtenov habarlady
Ol 13 kóshege jańa asfált tóselgenin aıtty, dep habarlaıdy Almaty-akshamy.kz
Sonymen qatar, Raıymbek – Rozybakıev kósheleri boıyndaǵy jolaıryǵyna jóndeý júrgizilip, 20 mekenjaı boıynsha 5 shaqyrym trotýar jelisiniń qurylysy aıaqtaldy.
Qazirgi kezde buryn rettelmeıtin tórt qıylysty baǵdarshamdarmen jabdyqtaý jáne retteletin batyrmaly baǵdarshamdardy ornata otyryp, 8 jaıaý júrginshiler ótkelin jańǵyrtý boıynsha jumystar júrgizilýde. Jumystar jyl sońyna deıin aıaqtalady.
Erjan Seıtenov aýlalar men kóshelerdi jaryqtandyrý týraly da aıtty.
- Osy jylǵa josparlanǵan 84 jaryqtandyrylmaǵan jáne jartylaı jaryqtandyrylǵan ýchaskelerdiń boıyna kóshe shamdaryn ornatý tolyǵymen aıaqtaldy. Aýdan kólemindegi 14 monýmentke qosymsha jaryq túsirdik, - dedi aýdan ákimi.
Sonymen qatar, Álimjanov kóshesiniń Panfılov kóshesinen Nazarbaev kóshesine deıingi jáne Sháripov kóshesiniń boıymen Abaı dańǵylynan Maqataev kóshesine deıingi bólikterindegi eski kóshe shamdary jańartyldy.
Esentaı ózeninen Saıran kóline deıin Shevchenko, Jeltoqsan kósheleri men Abaı dańǵylynyń boıyndaǵy kóshe jaryǵyn jańartý jumystary jalǵasýda.