Federasıanyń jańa prezıdenti Qazaqstanda gólfty damytýmen jáne nasıhattaýmen aınalysýǵa nıetti
"Qazaqstan gólf federasıasynyń" jańa prezıdenti bolyp Imanǵalı Tasmaǵambetovtiń ornyna kásipker Berik Qanıev taǵaıyndaldy, dep habarlaıdy Almaty-akshamy.kz El.kz-ke silteme jasap.
Berik Qanıev – qazaqstandyq kásipker jáne qoǵam qaıratkeri. Ol "Lancaster Group Kazakhstan" kompanıasy dırektorlar keńesiniń tóraǵasy, sondaı-aq bilim berý, sport jáne ekologıa salasyndaǵy birqatar áleýmettik jobalardyń quryltaıshysy. Olardyń qatarynda "Jas Qyran" fýtbol ortalyǵy, Respýblıkalyq fızıka-matematıka mektebi, Fızmat Endaýment qory jáne "Air Vision" ekofondy bar. Sondaı-aq, mesenat retinde "IQanat" jáne "Analar Úıi" jobalaryn qarjylandyrady.
Federasıanyń jańa prezıdenti Qazaqstanda gólfty damytýmen jáne nasıhattaýmen aınalysýǵa nıetti. Sonymen qatar, osy olımpıadalyq sport túrine jastardy tartý úshin balalar men jasóspirimder gólfin damytýdy josparlap otyr.
Aıta keteıik, Imanǵalı Tasmaǵambetov Qazaqstan gólf federasıasynyń prezıdenti bolyp byltyrǵy jyldyń mamyr aıynda saılanǵan. Ol buǵan deıingi basshysy Nurtaı Ábiqaevty almastyrǵan.
Elimizde gólf federasıasy 2006 jyly qurylǵan. Sodan beri sporttyń osy túrinen astanada gólf klýby ashylyp, «Ambassador'sCup» týrnıri ótkizile bastaǵan. Oǵan Qazaqstannyń saıası qaıratkerleri, sheteldik bıznes-qaýymdastyqtyń jáne elimizde tirkelgen dıplomatıalyq korpýstyń ókilderi qatysqan.