Qazaqstanda «Microsoft»-tyń aımaqtyq habynyń qurylýy mańyzǵa ıe
Sıfrlyq damý, ınovasıalar jáne aeroǵarysh ónerkásibi mınıstrligi men Qazaqstan Respýblıkasynyń San-Fransısko qalasyndaǵy (AQSH) Bas konsýldyǵynyń birlesken jumysynyń nátıjesinde «Microsoft» korporasıasymen Qazaqstan aýmaǵynda ornalasatyn mýltıaımaqtyq hab ashý týraly ýaǵdalastyqqa qol jetkizildi.
Bul týraly Sıfrlyq damý mınıstri Baǵdat Mýsınniń jáne Microsoft-tyń Qazaqstandaǵy Bas dırektory Sergeı Leshenkomen ekijaqty kezdesýi barysynda belgili boldy, dep habarlaıdy Almaty-akshamy.kz Egemen.kz-ke silteme jasap.
Hab qyzmeti Ortalyq Azıa, Ázerbaıjan, Armenıa, Grýzıa, Mońǵolıa jáne Pákistan elderin qamtıdy.
«Microsoft qyzmetin lokalızasıalaý Qazaqstanǵa aımaqtyq aýqymda tehnologıalar men ozyq sheshimderdi tartý ortalyǵyna aınalýǵa múmkindik beredi. Osylaısha, hab Microsoft korporasıasynyń tehnologıalyq damý jáne ınovasıalar ortalyǵy bola otyryp, shıkizattyq emes tehnologıalyq salalardyń ónimderin óndirý men eksporttaýdy yntalandyrý arqyly adamı kapıtaldy damytý jáne ulttyq ekonomıkany nyǵaıtýdyń draıveri bola alady», - dep atap ótti Sıfrlyq damý mınıstri Baǵdat Mýsın.
«Qazaqstanda «Microsoft»-tyń aımaqtyq habynyń qurylýy mańyzǵa ıe. Elderińizde tıisti ınfraqurylym bar. Biz qýana-qýana birlesken jobalardy iske asyryp, sizdermen jumys istegimiz keledi», - dep atap ótti Microsoft kompanıasynyń Qazaqstan boıynsha Bas dırektory Sergeı Leshenko.
Esterińizge sala keteıik, ótken jyldyń qyrkúıek aıynda Qazaqstan Respýblıkasynyń Prezıdenti Qasym-Jomart Toqaevtyń BUU Bas Assambleıasynyń Nú-Iork qalasynda ótken 77-sessıasyna qatysý úshin jasaǵan sapary aıasynda «Microsoft» korporasıasynyń Ortalyq jáne Shyǵys Eýropa boıynsha bas dırektory Mıshel Sımmonspen kezdesýi ótti. Kezdesý aıasynda odan ári yntymaqtastyq ornatý, atap aıtqanda, qazaqstandyq keńseni óńirlik habqa deıin keńeıtý máseleleri talqylandy.