Beısenbiniń tańynda Almaty áýejaıynda otandastary Rızabek Aıtmuhandy saltanatpen kútip aldy.
Áýejaıdyń kútý zaly erkin kúresten Qazaqstan tarıhyndaǵy tuńǵysh álem chempıonyn ári el tarıhyna aty qalatyn eń jas balýandy qarsy alýǵa kelgen qaýymǵa lyq toldy. Olar júldeli júırikterdi shara toly aq dámmen, qushaq toly gúl shoqtarymen qarsy aldy.
Serbıa astanasynda ala kilemdi qarsylastarynyń jaýyrynymen qaqqan júldegerler Rızabek Aıtmuhan men Azamat Dáýletbekovke jankúıer otandastary ıyǵyna shapan jaýyp el yqlasyn bildirdi. Kútip alý kezinde saltanatty marsh ekpini, aq nóserdeı sirkiregen dý qol shapalaq úni áýejaıdy kernep turdy.
BAQ ókilderine bergen jaýabynda balýan bylaı dep tebirendi: «Mundaı qoshemetpen qarsy alyp jatqan elime alǵys aıtamyn. Óte kúshti sezimde bolyp turmyn.... Sózben aıtyp jetkize almaımyn. Bul meniń armanym edi. Otandastaryma osyndaı sátti syılaǵanyma qýanyshtymyn».
Jarys jaıyndaǵy sózinde Rızabek: «Qarsylastar osal bolǵan joq, árıne. Degenmen, sheshýshi kezde barymdy saldym. Sońyna qaraı qarsylastyń sharshaǵanyn baıqadym. Sol sátti utymdy paıdalandym dep oılaımyn», – dep alǵynan jaryldy.
Belgradtaǵy beldesýde qola júldege ıe bolyp, Parıj olımpıadasynyń joldasyn utyp kelgen otandasymyz Azamat Dáýletbekov te qoshamat kórsetken jurtqa rızashylyǵyn jetkizdi. Ári óziniń áriptesi Rızabekke degen shynaıy qurmetimen bólisti. «Rızabekke rızamyn, 19 jasynda elimizden alǵashqy álem chempıony atandy. Bunysy jastarǵa úlgi, tipti bizge de motıvasıa berdi», – deıdi Azamat.
Respýblıkalyq grek-rım, erkin jáne áıelder kúresi federasıasynyń vıse-prezıdenti Bilaldın Ýshýrov jıylǵan jurtty quttyqtady. Bilaldın Talǵatuly sózinde: «Erkin kúresten tarıhymyzdaǵy birinshi chempıonymyz kelip jatyr. Barshańyzdy osy qýanyshpen quttyqtaımyn. Keleshekte osy balamyzdyń jolynyń ashyq bolýyn, kelesi joly Fransıada olımpıada chempıony atanyp, barshamyzdy qýantsyn dep tileımin!», – dedi.
Aıta keteıik, Serbıanyń ortalyq qalasy Belgradta ótken álem chempıonatynda Rızabek 92 kg salmaqta álem birinshiligin jeńip aldy. Bul el tarıhynda erkin kúresten alǵan alǵashqy chempıondyq ataq.