Dárigerler ekpe alyp, qalypty ómirge oralý kerektigin aıtyp jatyr.
Kóptegen damǵan elderde ekpe alý qartyny artyp keledi. Reseı Federasıanyń 14 aımaǵynda birinshi vaksınany alǵan azamattardyń sany 70% jetken, dep habarlaıdy Almaty-akshamy.kz.
Reseı
Rospotrebnadzordyń aıtýynsha, Federasıanyń 14 aımaǵynda birinshi vaksınany alǵan azamattardyń sany 70% jetti. Keıbir óńirlerde iri turǵyn úı keshenderiniń aýlasynda vaksına kólikterinde kóshpeli egý pýnktteri uıymdastyrylǵan. Turǵyndardyń biraz bóligin vaksınalaýmen qamtý úshin keshkilik ýaqytta jumystan qaıtatyn adamdardy ekpeden tys qaldyrmaý maqsatynda dárigerler sol ýaqytta aýlada ekpe egý boıynsha qyzmet kórsetýdi bastaıdy. Adamdar mundaı ádistiń ózderi úshin óte yńǵaıly ekendigin aıtyp, belsendilik tanytýda.
AQSH
Moderna preparatyn óndiretin AQSH farmasevtıkalyq kompanıasy ózderi ázirlegen vaksınanyń tıimdiligi ekinshi dozany engizgennen keıin alty aı ishinde 93% deńgeıinde saqtalatynyn habarlady. Bul atalmysh kompanıa júrgizgen alǵashqy klınıkalyq zertteýlerdiń nátıjesinen aıtarlyqtaı tómen emes. Bastapqyda epıdemıologıalyq tıimdilik 94% deńgeıinde boldy.
Pfizer jáne BioNTech resmı túrde preparattardyń tıimdiligi ekinshi vaksınasıadan keıingi alty aıda 84%-ǵa deıin tómendeıtinin resmı málimdedi.
Qytaı
Qytaı koronavırýsqa qarsy vaksınalar óndirisin ulǵaıtýda jáne álem elderine ımmýndaýǵa arnalǵan preparattyń 2 mıllıard dozasyn jetkizedi. Atalǵan kólemdegi ekpelerdi Qytaı osy jyldyń ishinde usynýǵa nıetti. Bul týraly QHR Tóraǵasy Sı Szınpın COVID-19 vaksınalary salasyndaǵy yntymaqtastyq jónindegi halyqaralyq forýmda aıtty. QHR basshysy Dúnıejúzilik densaýlyq saqtaý uıymynyń birlesken satyp alý jáne COVAX jobasy aıasynda vaksınany taratý boıynsha jahandyq jobasyna 100 mıllıon dollar jiberý josparlary týraly da habarlady.