Jastarǵa mamandyq tańdaýǵa kómektesedi.
Qazaqstan Úkimeti 2025 jylǵa deıin halyqtyń tabysyn arttyrýdy kózdep otyr. Úkimettiń kezekti otyrysynda osy maqsatta jasalyp jatqan sharalar jaıynda aıtyldy, dep habarlaıdy Almaty-akshamy.kz.
«Bizdiń qatysýymyzben barlyǵy 33 is-shara qarastyrylǵan, onyń 16-syn tikeleı mınıstrlikpen júzege asyratyn bolady. Bul sharalar kúnkóris deńgeıinen tómen tabys tabatyn halyqtyń úlesin azaıtý, jumyssyzdyq kólemin tómendetý, 2025 jylǵa deıin 2 mıllıondaı jańa jumys oryndaryn qurýdy kózdeıdi», – dedi Eńbek jáne halyqty áleýmettik qorǵaý mınıstri Serik Shápkenov.
Onyń aıtýynsha, jańa jumys oryndaryn qurý boıynsha jumys sheńberinde Eńbekmıni frılanserler qyzmetin sıfrlyq formatqa kóshirý maqsatynda «platformalyq jumys» elektrondyq servısin ázirleýde. Bul ózin-ózi jumyspen qamtyǵan azamattardyń qyzmetin túrli platformalarda ońaı tirkeýge, qajetti mamandardy tez tabýǵa, eńbek quqyqtaryn qorǵaýǵa jáne tapsyrys berýshilermen qarym-qatynasty resmı túrde rásimdeýge múmkindik beredi.
Budan basqa, 3 jáne 4 sanattar boıynsha (mamandar men bilikti jumysshylar) sheteldik jumys kúshin tartýǵa kvota 4,7 myń adamǵa qysqartyldy.
«Jańa jumys oryndaryn qurý óńirlik jumyspen qamtý kartalaryn ózektendirý jáne aqparattyq júıeni turaqty jańartý arqyly baqylanady», – dep tolyqtyrdy Serik Shápkenov.
Halyqty jumyspen qamtýǵa járdemdesý baǵyty boıynsha aqparattyq júıelerdi saraptaý nátıjesinde áleýmettik qoldaýǵa jáne jumyspen qamtýǵa muqtaj azamattardy «Erte anyqtaý júıesi» engiziletin bolady. Bul rette otbasynyń sıfrlyq kartasy arqyly áleýmettik mártebesi joq, qoldaýǵa muqtaj azamattardyń portreti ázirlenedi jáne olardyń naqty qajettilikteri aıqyndalady.
Sondaı-aq, jastarǵa arnalǵan «Alǵashqy jumys orny», túlekterge arnalǵan «Jastar praktıkasy», «Urpaqtar kelisimsharty» jobalary sheńberinde sýbsıdıalaýdyń uzaqtyǵy men mólsheri ulǵaıtylatyn bolady.
Jastardy jumysqa yntalandyrý úshin zańnamaǵa «jas jumysshy» uǵymyn engizý, olar úshin synaq merzimin alyp tastaý, basqa óńirlerden jumysqa kelgen jastar úshin turǵyn úıdi jalǵa alýǵa kóterme járdemaqy engizý jóninde sharalar qabyldanatyn bolady.
Kóp balaly otbasylar (76,8 myń) jáne múgedek balalardy tárbıelep otyrǵan otbasylar (7 myń) úshin barlyq óńirlerde Áıelderdi qoldaý ortalyqtaryn qurý josparlanýda.
«Bul sharalar naqty qajettilikter boıynsha áleýmettik qoldaýǵa muqtaj azamattardy anyqtaýǵa, jastardyń jumyspen qamtylýyn qamtamasyz etýge, balaly otbasylarǵa kómek kórsetýge múmkindik beredi», – dep atap ótti Serik Shápkenov.
Kásiptik daǵdylardy damytý jáne eńbek resýrstaryn kásiptik baǵdarlaý baǵyty boıynsha jumys berýshilermen birlesip, kásiporyndar janyndaǵy oqý ortalyqtarynyń bazasynda jappaı qaıta daıarlaý jáne biliktilikti arttyrý «fabrıkalary» qurylatyn bolady. Jastardy oqytýǵa jáne suranysqa ıe mamandyqtar boıynsha kadrlar daıarlaýǵa erekshe nazar aýdarylatyn bolady.
«Sondaı-aq, suranysqa ıe daǵdylardy taný júıesi engizilýde. Memleket basshysynyń tapsyrmasy boıynsha Eńbekmıni «Ulttyq biliktilik júıesi týraly» zań jobasyn ázirleýde. Onyń sheńberinde biliktilikti tanýdyń táýelsiz ortalyqtaryn qurý úshin tıimdi jaǵdaılar jasaý, jyl saıynǵy sertıfıkattaýdan ótý úshin izdenýshilerge keminde 1000 vaýcher usyný kózdeledi. Skills.enbek.kz platformasynda onlaın oqý arqyly jańa bilim men daǵdylardy ıgerýge jaǵdaı jasalady. Oqýshylar men jastar arasynda kásiptik baǵdarlaýdy uıymdastyrý úshin mansaptyq ilgerileý boıynsha keminde 100 nusqaýlyq ázirlenetin bolady», – dep tolyqtyrdy Serik Shápkenov.
Sonymen qatar, suranysqa ıe mamandyqtar tizimi jyl saıyn jańartylyp otyrady.
«Bul sharalar jumys berýshilerdiń suranysy boıynsha kadrlar daıarlaýǵa, jastardy eńbek naryǵynda suranysqa ıe mamandyqtar men daǵdylar týraly habardar etýge, olarǵa mamandyq tańdaýda qoldaý kórsetýge múmkindik beredi», – dep túıindedi Eńbekmıniniń basshysy.