Qazaqstandyq boksshy kýbalyq Davıd Morrelden nokaýtpen jeńilgen bolatyn.
Suleimen Promotions promoýterlik kompanıasy qazaqstandyq boksshy Aıdos Erbosynulynyń densaýlyǵyna qatysty málimdeme jasady, dep habarlaıdy Almaty-akshamy.kz Elorda.info saıtyna silteme jasap.
«AQSH-taǵy ókilimizdiń sózinshe, boksshymyzdyń densaýlyǵy aıtarlyqtaı jaqsardy, sonyń ishinde fızıkalyq jaǵdaıy – Aıdos ózdigimen aıaǵyn basyp, júre alady. Sondaı-aq boksshymyzdyń aqyl-esi jaqsy. Onymen qosa, Aıdos dárigerlerdiń suraǵyn túsinip, olarǵa op-ońaı jaýap berip jatyr. Mamandar málimetine sáıkes, Aıdos tez saýyǵyp keledi.
Ókilimizdiń aıtýynsha, taıaý ýaqytta boksshymyz aýrýhanadan shyǵarylyp, Otanyna oralýy yqtımal.
Sondaı-aq AQSH-qa Aıdostyń jubaıy bardy. Qazir ol boksshynyń janynda. Árıne, ol úshin bul úlken qoldaý», - dep habarlady Suleimen Promotions kompanıasynyń ókilderi.
Eske sala ketsek, qarasha aıynyń basynda qazaqstandyq boksshy kýbalyq Davıd Morrelden nokaýtpen jeńilgen bolatyn. Sýper orta salmaq sanatyndaǵy jekpe-jek WBA-diń «turaqty» álem chempıony ataǵy úshin ótti.
Aıqastan keıin A.Erbosynuly shuǵyl túrde Mınneapolıs qalasyndaǵy aýrýhanalardyń birine jetkizildi. Oǵan «mıyna qan ketý» dıagnozy qoıyldy. Budan ári ol jasandy túrde komaǵa jiberilip, ota jasaldy.