Mamandar kórsetilgen mekenjaıǵa bardy.
Almatyda №122 jolaýshylar avtobýsy jol ústindegi oıyqqa túsip ketken, dep habarlaıdy Almaty-akshamy.kz.
Oqıǵa ornynan túsirilgen sýret áleýmettik jelilerde tarady. Jarıalanym avtorynyń aıtýynsha, oqıǵa qaladaǵy "Mádenıet" shaǵynaýdanynda bolǵan.
"Barlyǵy opyrylyp jatyr. Jol eshqashan jóndelmegen. Joǵarydaǵylardyń bireýi kelgen kezde ǵana jóndeı bastaıdy. Bizde tipti jol jıegi de joq, bári opyrylyp jatyr. Kólikter men avtobýstar óte almaıdy", - dep jazylǵan jarıalanymda.
Atalmysh jaǵdaıǵa baılanysty qalalyq energetıka basqarmasy jaýap berdi. Almaty qalalyq Energetıka basqarmasynyń málimetinshe, qazir mamandar atalǵan mekenjaıǵa attandy. Opyrylyp túsken jer arnaıy lentamen qorshalǵan, jaqyn arada qalpyna keltirý jumystary júrgiziletin bolady.