Ótken jylmen salystyrǵanda eki ese kóp.
Aǵymdaǵy jyly egis jáne egin jınaý jumystaryna 220 mlrd teńgeden astam qarajat bólinedi, bul ótken jylmen salystyrǵanda eki ese kóp. Bul týraly Úkimet otyrysynda Qazaqstan Premer-Mınıstri Álıhan Smaıylov málimdedi, dep habarlaıdy Almaty-akshamy.kz Eldala.kz silteme jasap.
Ol atap ótkendeı, 70 mlrd teńge kóleminde búdjettik nesıelendirýmen qatar, aǵymdaǵy jyly Azyq-túlik korporasıasy tarapynan aýyl sharýashylyǵy ónimderin forvardtyq satyp alýǵa bólingen qarajat kólemi 80 mlrd teńgege deıin ulǵaıtylǵan. Respýblıkalyq búdjetti naqtylaý barysynda kóktemgi egis jáne egin jınaý jumystaryna taǵy 70 mlrd teńge bólinedi.
«Budan basqa, tyńaıtqyshtar men pestısıdterdi satyp alýdy sýbsıdıalaý qunynyń 50% buryn josparlanǵan deńgeıde saqtalýda. Sondaı-aq, ótken jyldyń sheginde qaıta óńdeýge tapsyrylǵan tuqymdardy, basym daqyldardy satyp alýdy, sý berý jónindegi qyzmetterdi sýbsıdıalaý saqtalady», - dep habarlady Premer-Mınıstr.
Onyń aıtýynsha, tehnıkalyq jańartý deńgeıin arttyrý úshin ınvestısıalyq sýbsıdıalaý jáne nesıeler men lızıń boıynsha paıyzdyq mólsherlemeni sýbsıdıalaý kólemi ulǵaıtylady.
«Agrarshylar suranys joǵary bolyp otyrǵan daqyldar alańyn ulǵaıtyp, osy baǵytty basymdyqpen qarjylandyrýdy qamtamasyz etýi qajet. Bul rette eksportqa baǵdarlanǵan tıimdiligi joǵary daqyldardy egýge de erekshe nazar aýdarý kerek. Bul mindetter agrotehnologıalardy múltiksiz saqtaýdy, tyńaıtqyshtar men ósimdikterdi qorǵaý quraldaryn ýaqtyly engizýdi talap etedi», - dep atap ótti Smaıylov.
Premer-Mınıstr Aýyl sharýashylyǵy mınıstrligi men óńirlerdiń ákimderine kóktemgi egis jumystaryn sapaly ári ýaqtyly júrgizý máselesin erekshe baqylaýda ustaýdy tapsyrdy.
«Aýyl sharýashylyǵy mınıstrligi oblys ákimdikterimen birlesip, egis alqaptaryn ártaraptandyrý aıasynda áleýmettik mańyzy bar jáne jemshóp daqyldarynyń qajetti kólemin egýdi qamtamasyz etsin, onyń ishinde sharýashylyqtardy birinshi kezekte azyq-túlik kelisimshart korporasıasynyń forvardtyq satyp alýy sheńberinde yntalandyrsyn», - dedi Smaıylov.
Ol ótken jyly elimizdiń keıbir óńirlerinde jemshóppen qamtamasyz etýde problemalar bolǵanyn eske saldy.
«Bıyl bul jaǵdaı qaıtalanbaýy tıis», - dep atap ótti Premer-Mınıstr.
Sonymen qatar, Ekologıa mınıstrligine Aýyl sharýashylyǵy mınıstrligimen jáne óńirlerdiń ákimderimen birlesip, barlyq jazǵy kezeńde aýyl sharýashylyǵy taýar óndirýshilerin sýmen qamtamasyz etý boıynsha sharalar qabyldaý tapsyryldy.
«Indýstrıa mınıstrligi óńirlerdiń ákimderimen birlesip, mıneraldy tyńaıtqyshtar óndirýshilermen ishki naryqty basym tártippen qamtamasyz etý boıynsha jumys júrgizsin. Bul jerde bıylǵy jyly eki ese ósken olardyń baǵasy da mańyzdy. Monopolıaǵa qarsy organ tyńaıtqysh óndirýshilermen máseleni pysyqtasyn», - dep túıindedi Smaıylov.