Almaty oblysynyń polıseıleri terorızmge osal 1200-den astam nysandardyń lańkestikke qarsy qaýipsizdik jaǵdaıyn baqylaýdy qamtamasyz etý boıynsha turaqty jumys júrgizip jatyr, dep habarlaıdy Almaty-akshamy.kz Polisia.kz-ke silteme jasap.
«Oblystyq ekstremızmge qarsy is-qımyl departamentiniń qyzmetkerleri qaýipsizdik qyzmetin baqylaý bólimderimen birlesip, terorızmge osal nysandardyń basshylarymen turaqty túrde kezdesýler ótkizip turady. Túsindirý jumystary barysynda lańkestikke qarsy qorǵaý talaptary, lańkestik aktisi oryn alǵan kezdegi alǵashqy is-qımyldar, terorızmge qarsy qorǵanys pasporttaryn ázirleý boıynsha usynystar jáne basqa da máseleler týraly aqparattandyrylady», – dedi Almaty oblysy PD EQİQB bastyǵynyń m.a. Ulan Baıtaqov.
Bıyl lańkestikke qarsy qorǵanys boıynsha 182 nysan tekserildi. Tekserý nátıjesinde 43 nysannyń lańkestikke qarsy zańnama talaptaryna sáıkes kelmeıtini anyqtalyp, menshik ıeleri men basshylaryna anyqtalǵan buzýshylyqtardy joıý týraly uıǵarym shyǵaryldy.
«Sonymen qatar osyndaı obektilerdiń menshik ıelerimen, basshylarymen jáne qyzmetkerlerimen semınarlar ótkizilip, onda terorızmge qarsy is-qımyl salasyndaǵy zańnama, terorıstik aktini jasaý qaýpi tóngen kezdegi is-qımyl algorıtmi, olarǵa qoıylatyn talaptar túsindiriledi, obektilerdi zamanaýı qaýipsizdik júıelerimen, onyń ishinde beınebaqylaý júıelerimen, eskertý júıelerimen, dabylmen jáne t.b. jabdyqtaý boıynsha tekseriledi. Erekshe nazar terorızm aktisi týraly jalǵan habar bergeni úshin qarastyrylǵyn qylmystyq jazaǵa aýdarylady», – dep atap ótti U. Baıtaqov.
Osy nysandardyń basshylary men qyzmetkerleri úshin terorızmge qarsy qorǵaýdy qamtamasyz etý úshin İshki ister mınıstrligimen terorıstik akt nemese ózge de quqyqqa qaıshy áreketter jasaý qaýpi tóngen kezde nusqaýlyqtar ázirlenip, joldandy. Nusqaýlar Ulttyq qaýipsizdik komıteti men İshki ister mınıstrliginiń resmı saıttarynda ornalastyrylǵan.