Qazaqstanda "Otaý" baǵdarlamasy boıynsha ótinimderdi qabyldaý aıaqtaldy.
"Otaý" turǵyn úı baǵdarlamasy boıynsha 1 naýryzdan 30 sáýirge deıin sozylǵan ótinim qabyldaý merzimi aıaqtalyp, bul merzimde 25 038 myń ótinim qabyldanǵan, dep habarlaıdy almaty-akshamy.kz "Otbasy bankine" silteme jasap.
Ótinim bergenderdiń basym bóligi – 35 jasqa deıingi jastar:
16 747 adam (67%) – 35 jasqa deıingi azamattar;
8291 adam (33%) – 35 jastan asqandar.
Endi 15 mamyrǵa deıin ótinimder saralanyp, olarǵa upaılar beriledi.
Qatysýshylardy irikteý baldyq júıe boıynsha júrgiziledi:
Salym boıynsha syıaqy mólsheriniń kólemi – árbir 1 000 teńge úshin 5 bal;
Depozıt merzimi – árbir jyl úshin 5 bal (klıent baǵdarlamaǵa birneshe depozıtpen qatysqan jaǵdaıda, jınaqtaý merzimi uzaǵyraq depozıt eskeriledi);
Tirkelgen nekeniń bolýy – nekede turý jyldaryna qaramastan 10 bal;
Balalardyń bolýy (18 jasqa deıingi) – balalardyń sanyna qaramastan 50 bal.
İrikteýden ótken klıentterdiń tizimi "Otbasy bankiniń" saıtynda jarıalanady.
Eske salaıyq, nesıeniń eń joǵary somasy Almaty men Astanada 30 mıllıon teńgeni, basqa aımaqtarda 18 mıllıon teńgeni quraıdy. Almaty, Astana, Shymkent jáne oblys ortalyqtarynda tek bastapqy turǵyn úıdi, onyń ishinde QTK kepildigimen úlestik qatysý sharty boıynsha satyp alýǵa bolady. Qalǵan eldi mekenderdiń barlyǵynda kez kelgen baspana túrin satyp alýǵa bolady.