Elimizdiń birqatar óńirinde aq tútek boran áli basylǵan joq.
Elimizdiń birqatar óńirinde aq tútek boran áli basylǵan joq. Qolaısyz aýa raıy saldarynan tas joldardyń 61 ýchaskesinde qatynaý ýaqytsha toqtatyldy, dep habarlaıdy Almaty-akshamy.kz Almaty.tv-ge silteme jasap.
Tótenshelikter joldy qalypqa keltirýge kúsh salǵanymen, qys qahary qatty bolyp tur. Mamandar sońǵy bir táýlikte eskertýge qaramastan, jolǵa shyǵyp ketken 40-qa jýyq adamdy aman alyp qalǵan. Olardyń qatarynda bala da bar.
Tótenshelikterdiń aq tútek boranmen arpalysqaly tórtinshi táýlik. Qazir eldegi respýblıkalyq avtojoldardyń 21 ýchaskesinde kólik qozǵalys shektetilgen. Shyǵysta jaǵdaı sońǵy táýlikte qıyndaı túsken. Ulytaý men Qostanaı, Jezqazǵan men Petropavl arasyn jalǵaǵan avtojolda kóliktiń barlyq túrimen qatynaý toqtatyldy.
«Osy bir jetiniń ishinde biryńǵaı 1403 koll-ortalyǵy 40 myńnan astam qońyraýdy qabyldady. Onyń barlyǵy jolda qalyp qoıǵan kólikter, kómek suraǵandar, respýblıkalyq mańyzy bar joldar týraly aqparat alǵysy keletin turǵyndardan kelip tústi», – dedi «QazAvtoJol» UK resmı ókili Lázzat Stamǵazıeva.
Kún raıy qolaısyzdyǵyn jolaýshylarǵa ǵana emes, mektep oqýshylaryna da tıgizdi. Búgin úshinshi toqsandy birqatar óńirde balalar onlaın oqyp bastady. Qatty aıaz saldarynan Soltústik Qazaqstan oblysy men Qostanaı, Semeı, Astanada 1 men 9 synyp oqýshylary qashyqtan bilim berý formatyna aýystyrylǵan. Bul taǵy 2-3 kúnge sozylýy múmkin. Sebebi «Qazgıdromet» mamandary aldaǵy kúnderi barlyq óńirde qalyń qar jaýyp, kún kúrt sýytady dep boljap otyr.
«Aýa temperatýrasy elimizdiń batysynda túnde 27-33, kúndiz 15-25 gradýs aıaz, ońtústik-batysynda túnde 12-23, kúndiz 5-15-ke deıin aıaz jáne soltústik-batysynda 32-40-qa deıin aıazdan 20-30 aıazǵa deıin tómendeýi kútiledi», – dedi ınjener-sınoptık Altynzer Esbýsınova.
«Bizge habarlama tańerten keledi. Birinshi jáne ekinshi aýysymǵa aýa raıy qolaısyzdyǵyna baılanysty sabaqty onlaın ótýge daıynbyz», – dedi D. Qonaev atyndaǵy №66 mektep-lıseıiniń muǵalimi Sandýǵash Qýanyshbekqyzy.
Tótenshelikterdiń aqparynsha, kún raıyna qaramaı jolǵa shyǵyp ketetinder kóbeıgen. Sońǵy táýlikte qutqarý qyzmeti aıazda tońyp, jolda qalǵan 37 adamdy aman alyp qalypty. Arasynda kámeletke tolmaǵan toǵyz bala bar. «Munymen qosa, qazir respýblıkalyq mańyzy bar joldar boıynda dittegen jerine jete almaı uzyn-sonar kezekte turǵan kólikter de az emes», - deıdi mamandar. Abaı oblysynda 80, Kókpekti – Qalbataý baǵytynda 39, Aqtóbede 40-qa jýyq kólik jınalyp qalǵan.
«Ótken táýlikte Astanada 78 jol-kólik oqıǵasy tirkeldi. Astana qalalyq PD aýa raıy jaǵdaıyna baılanysty jol qozǵalysynyń barlyq qatysýshysyna barynsha muqıat bolýyn eskertedi. Júrgizýshilerge kólikti jol boıyna qoımaýǵa, qoǵamdyq kólikter qozǵalysyna kedergi keltirmeýge shaqyramyz», – dedi PD JPQ basqarmasy bastyǵynyń orynbasary Erjan Ádilbekov.
Mamandar búgin-erteń halyqty aıaz ben boranda alys jolǵa shyqpaýǵa shaqyrady. Búgin Astanadan barlyq baǵytqa shyǵatyn tasjoldar jabylǵan.