İzdestirý jumystary 8 táýlik boıy júrgizilýde.
Ulytaý oblysynda joǵalǵan eki qoıshy 8 kúnnen beri tabylmaı jatyr, dep habarlaıdy Almaty-akshamy.kz Tótenshe jaǵdaılar mınıstrligine silteme jasap.
Búgin, 9 qańtarda, izdeý jumystaryna TJM avıasıasy jumyldyryldy. İzdestirý júrgizilgen baǵyt - Jezqazǵan qalasy - «Toba» qystaǵy jáne «Kishi Kıik» qystaǵy - Jezqazǵan qalasy.
İzdestirýge Ulytaý aýdany boıynsha tótenshe jaǵdaılar departamentiniń, polısıa departamentiniń jáne jergilikti atqarýshy organdardyń kúshteri men quraldary jumyldyryldy.
Eske salsaq, «Kishi Kıik» qystaýynyń 58 jastaǵy jumysshysy 31 jeltoqsan kúni qystaqtan belgisiz baǵytta shyǵyp ketken bolatyn. Joǵalǵany týraly 2 qańtarda habarlandy. İzdestirý jumystary 8 táýlik boıy júrgizilýde.
Sondaı-aq 3 qańtar kúni keshke «Toba» qystaǵynyń ıesi - 44 jastaǵy qoıshy mal izdeýge shyǵyp, oralmaǵany týraly habarlaǵan.
«Eki adamdy izdeý jumystary jalǵasýda. TJ departamenti qys mezgilinde qaýipsizdik erejelerin saqtaý qajettigi týraly eskertedi. Daýyldy eskertýlerge nazar aýdaryńyz jáne aýa raıy nasharlaǵan jaǵdaıda úıde bolyńyz», - dedi vedomstvodan.
Tótenshe jaǵdaı kezinde qutqarý qyzmetiniń táýlik boıǵy 112 biryńǵaı nómirine nemese 101 nómirine qońyraý shalýǵa bolady.