Keńes áskerleriniń sońǵy legi Aýǵanstannan 1989 jyldyń 15 aqpanynda shyqty.
Qazaqstan Qarýly Kúshteriniń áskerı bólimderi men mekemelerinde keńes áskerleriniń Aýǵanstannan shyǵarylǵanyna 33 jyl tolýyna oraı is-sharalar ótkizildi, dep habarlaıdy Almaty-akshamy.kz.
«Internasıonalıs jaýyngerlerdiń eskertkishterine gúl shoqtary qoıyldy. Aýǵanstandaǵy urys is-qımyldaryna qatysqan ardagerlermen áskerı qyzmetshilerdiń kezdesýleri, «Jas sarbaz» áskerı-patrıottyq qozǵalysynyń tárbıelenýshileri arasynda erlik sabaqtary uıymdastyryldy. Aýǵan soǵysynyń ardagerleri patrıotızmniń, Otanǵa adal qyzmet etýdiń jáne áskerı boryshty oryndaýǵa ázir bolýdyń mańyzdy ekenin aıtty», - delingen Qorǵanys mınıstrliginiń baspasóz qyzmetiniń habarlamasynda.
Nur-Sultan qalasyndaǵy Qarýly Kúshterdiń Ulttyq áskerı-patrıottyq ortalyǵynda aýǵan jaýyngerlerine arnap kórme men konsert uıymdastyryldy.
Keńes áskerleriniń sońǵy legi Aýǵanstannan 1989 jyldyń 15 aqpanynda shyqty. Aýǵanstandaǵy áskerı is-qımyldarǵa qatysýshylar ózderiniń áskerı boryshtaryn abyroımen atqaryp, qazirgi áskerı qyzmetshiler úshin batyrlyqtyń, erliktiń úlgisi bolyp tabylady.
Resmı statısıkaǵa súıensek, Aýǵanstandaǵy soǵys qımyldaryna 22 myńǵa jýyq qazaqstandyq qatysty. Olardyń 900-den astamy qaza tapty, 21 adam habar-osharsyz ketti. Atap ótsek, 4 300-den astam qazaqstandyq jaýynger ordendermen jáne medaldarmen marapattaldy, olardyń altaýy Keńes Odaǵynyń Batyry, bireýi Halyq Qaharmany ataǵyn aldy.
Búginde elimizde 15 myńnan astam ınternasıonalıs-jaýynger turady. Kóbi eldiń qoǵamdyq ómirine belsendi qatysyp, jastardy áskerı-patrıottyq tárbıeleý jumysyna atsalysady.