Megapolıste týberkýlezben kúres aılyǵy bastaldy. Osyǵan oraı QR Densaýlyq saqtaý mınıstrligi Ulttyq ftızıopýlmonologıa ǵylymı ortalyǵynyń dırektory Málik Ádenovtyń qatysýymen ÓKQ alańynda brıfıń ótti, dep habarlaıdy Almaty-akshamy.kz.
Mamannyń aıtýynsha, týberkýlez - aýa arqyly naýqas adamnan jótelý, túshkirý, sóılesý kezinde juǵatyn ınfeksıalyq aýrý.
«Adam bul aýrýdy juqtyrǵan bolýy múmkin, biraq soǵan qaramaı, týberkýlez bakterıasy aǵzada uzaq jyldar boıy ómir súre alady jáne bilinbeýi múmkin, óıtkeni deneniń ımýndyq júıesi aýrýdyń odan ári damýyna kedergi keltiredi. Imýndyq júıe bakterıalardyń kóbeıýine tótep bere almaǵan kezde adamdar aýyrady», - dedi M.Ádenov.
Aýrýdyń týyndaýyna jetkiliksiz nemese tolyqtaı tamaqtanbaý, temeki shegý, alkogól nemese esirtki, aýyr fızıkalyq eńbek kúızelisi, sozylmaly aýrýlar sebepteri bolýy múmkin.
Maman aýrýdy kelesi belgilermen anyqtaýǵa bolatynyn qosty: 2 aptadan astam jótel, salmaq joǵaltý, tersheńdik, keýdedegi aýyrsyný, qan túkirý (sırek), jalpy álsizdik jáne tez sharshaý, uzaq ýaqyt boıy dene temperatýranyń kóterilýi.
«Eki apta boıy atalǵan belgilerdiń bireýi nemese birnesheýi baıqalsa da, siz dereý turǵylyqty jerińiz boıynsha jaqyn jerdegi medısınalyq uıymǵa habarlasyp, týberkýlezge tekserilýińiz kerek. Dıagnostıkaǵa PTR qaqyryqty taldaý jáne basqa da zerthanalyq jáne klınıkalyq zertteýler kiredi», - dep jalǵastyrdy ÓKQ spıkeri.
Bizdiń elimizde týberkýlezdi tekserý jáne emdeý tolyǵymen tegin jáne tegin medısınalyq kómektiń kepildik berilgen kólemi aıasynda júzege asyrylady.
Týberkýlez anyqtalǵan jaǵdaıda, tolyq emdeý kýrsynan ótý qajet jáne barlyq baılanysta bolǵan adamdar kórsetkishteri boıynsha profılaktıkalyq emdeý kýrsynan ótýi kerek. Týberkýlez der kezinde anyqtalyp, tolyq emdeý kýrsymen emdeledi. Týberkýlezdi sátti emdeýdiń kilti - úzdiksiz emdeý.
Almatylyqtarǵa ımýndyq júıeni nyǵaıtý, salaýatty ómir saltyn ustaný, únemi tolyqqandy tamaqtaný, bólmeni jıi jeldetý, ylǵaldy tazalaý jumystaryn júıeli túrde júrgizý keńesi berildi. Densaýlyǵyńyz nasharlasa, medısınalyq kómekke júginińiz.