Almatynyń Naýryzbaı jáne Túrksib aýdandarynda ótken jyldan beri týberkýlezge ekspress dıagnostıka jasaıtyn ortalyqtar jumys isteıdi
Óńirlik komýnıkasıalar qyzmetinde ótken brıfıńte Almaty qalasyndaǵy ftızıopýlmonologıalyq ortalyq dırektorynyń mindetin atqarýshy Qazıma Qajykenova elimizdiń eń úlken megapolısinde týberkýlezdiń qalaı anyqtalyp, emdeletini týraly aıtyp berdi, dep habarlaıdy Almaty-akshamy.kz.
Medısına mamanynyń aıtýynsha, Almaty qalasynda da, respýblıka kóleminde de týberkýlezge qarsy kúreske erekshe kóńil bólinýde. Qoldanystaǵy normatıvtik-quqyqtyq aktilermen qatar, 2022 jyldyń jeltoqsanda Almaty qalasynyń ákimdigi 2023-2024 jyldarǵa arnalǵan Jol kartasyn bekitti, onda ftızıopýlmonologıalyq qyzmettiń kadrlyq áleýetin kúsheıtý týraly, týberkýlezdi anyqtaý men emdeýdiń zamanaýı ádisterin qoldaný týraly, balalar men eresekter arasynda týberkýlezdi aldyn alý boıynsha is-sharalar júrgizý týraly jáne týberkýlezge qarsy kúreste azamattyq qoǵamnyń rólin kúsheıtýdi qamtyıtyn is-sharalar bekitildi.
«Almaty qalasynda KVI indetiniń teris áserine qaramastan, týberkýlez boıynsha turaqty epıdemıologıalyq ahýal saqtalýda jáne negizgi kórsetkishter respýblıkalyq ortasha deńgeıdegi kórsetkishterden tómen. Sońǵy 5 jylda Almaty qalasynda týberkýlezben aýyrý kórsetkishi 35,1%, al týberkýlezden bolatyn ólim kórsetkishi 25,1% paıyzǵa tómendedi», - dep habarlady Qazıma Qajykenova.
Jańa juqtyrý jaǵdaılaryn emdeýdiń tıimdiligi de 87%-dan asty. Ótken jyly týberkýlezben aýyratyn 876 naýqasqa áleýmettik qoldaý kórsetilse, Almaty qalasynyń ákimdigi týberkýlezben aýyratyndarǵa aı saıyn 35 000 teńgeden aqshalaı kómek kórsetýde. Úkimettik emes uıym naýqastarǵa jol júrý bıletteri, azyq-túlik paketteri jáne aqshalaı tólemder túrinde kómek kórsetedi.
«Molekýlalyq-genetıkalyq ádisterine qoljetimdiligin keńeıtý úshin 2022 jyldan bastap Naýryzbaı (№36 QE) jáne Túrksib aýdanyndaǵy (№24 QE), týberkýlezdi jedel dıagnostıkalaý ortalyqtary ashyldy, emhanalarda G-Xpert apparaty ornatyldy», - dep jalǵastyrdy ÓKQ spıkeri.
Búgingi kúni týberkýlezben aýyrýdy tómendetý kórsetkishterine qol jetkizý ftızıatrıalyq qyzmet pen MSAK júrgizilip jatqan júıeli jumystarynyń arqasynda múmkin bolyp otyr.