Zań buzǵandar15 myń teńge aıyppul tóleıdi nemese 5 táýlikke deıin qamalady
Almatyda temirjol bıletin arzanǵa alyp, jolaýshylarǵa qymbatqa satqan 8 derek tirkelgen, dep habarlaıdy Almaty-akshamy.kz Almaty.tv-ge silteme jasap.
Temirjol vokzalynda bılet tapshylyǵyn óz paıdasyna jaratqan pysyqaılar azaımaı tur. Olar poıyzǵa bılet tappaǵan jurtqa óz qyzmetterin usynady. Ol úshin arnaıy aqy da suraıdy eken. Zań buzǵandarǵa aıyppul da tosqaýyl bola almaı tur. Sebebi, ákimshilik quqyqbuzýshylyq úshin 15 myń teńge aıyppul salynady nemese 5 táýlikke deıin qamalady.
«Almaty-1 stansasyndaǵy jelilik polısıa basqarmasynyń qyzmet atqarý aýmaǵynda 1300-den asa azamat ákimshilik jaýapkershilikke tartyldy. Sonymen qatar, jol júrý bıletterin satyp alý qyzmetin usynǵan 8 adam ákimshilik jaýapkershilikke tartyldy», – dedi «Almaty-1» jelilik polısıa basqarmasynyń bólim bastaǵy Jandar Ábdiqaparov.
Qaladaǵy temirjol vokzaldarynda qazir jolaýshylar aǵyny kóp. Olardyń basym kópshiligi Alakól men Balqash sekildi demalys oryndaryna asyqqandar. Jolaýshylar júrdek poıyzǵa bılettiń kúrt qymbattap ketkenin aıtady.
«Men buryn Qaraǵandydan Almatyǵa 6 myń teńgege bılet satyp alatynmyn. Osy joly bir bılet qana taptym. Onyń ózi 20 myń teńge dep tur. Oǵan ne sebep ekenin eshkim aıtqan joq. Saıttan alamyzǵoı biz», – dedi jolaýshy Ulpan.
Sómkeleri men qol dorbalaryn arqalaǵandardyń kópshiligi bıletti aldyn ala alyp qoıǵan. Qazir kasa aldyna kelip, kezekte telmirip turyp bılet alatyndardyń qatary sırek. Kópshiligi onlaın rásimdeıdi.
«Astana qalasyna bara jatyrmyz. Bıletti 1 aı buryn alyp qoıdyq. Negizi bılet tapshylyǵy bar. Jaqyndaǵanda 1-2 kún qalǵanda bılet paıda bolady eken. Ony biz bilmeımiz ǵoı», – dedi jolaýshy Dana Álıeva.
«Qazaqstan Temir joly» Ulttyq kompanıasy bılet tapshylyǵyn joıý maqsatynda bar múmkindik jasalyp jatqanyn aıtty. Ol úshin qosymsha poıyzdar men vagondar sanyn arttyrý da qarastyrylǵan eken.
«2019 jyldan bastap biz ózimizdiń resmı saıtymyzda arnaıy portal engizdik. Ol portaldyń maqsaty – alypsatarlarǵa tosqaýyl qoıý. Bul saıtta bir adam óziniń jeke kabıneti arqyly sanaýly bılet ǵana satyp ala alady. Qazir jazǵy maýsymda 158 baǵyt boıynsha poıyzdar qatynap júr. Onyń ishinde 11 baǵyt Alakólge barady», – dedi «Jolaýshylar tasymaly» AQ resmı ókili Mádı Muhamedqalı.
Alakólge baryp demalatyn qazaqstandyqtardyń sany burynǵydan arta túspek. Sebebi, Úsharaldaǵy áýejaıdyń ushyp-qoný jolaǵy qaıta jańartyldy. Áýejaı 10 shildeden bastap ushaq qabyldaı bastaıdy.