Óz bıznesin bastaǵysy keletinder arnaıy jobaǵa qatysyp, bilim aldy.
Qazaqstan Úkimeti halyqty jumyspen qamtýǵa arnalǵan sharalardy iske asyryp keledi. Osy maqsatta iske qosylǵan ulttyq jobaǵa 185 myń adam qatysyp, bilimin jetildirgen, dep habarlaıdy Almaty-akshamy.kz.
«Osy jylǵy 1 maýsymdaǵy jaǵdaı boıynsha, 2021-2025 jyldarǵa arnalǵan kásipkerlikti damytý jónindegi ulttyq jobanyń qatysýshylary 185 myń adam boldy. 167,1 myń adam jumysqa ornalastyryldy. Onyń 91,2 myńy turaqty jumysqa ornalasty», - delingen Eńbekmıni baspasóz qyzmetiniń habarlamasynda.
Jumys berýshilerdiń ótinishi boıynsha 3,4 myń adam oqý úshin oqytý uıymdaryna jiberildi.
Óz kásibin bastaý úshin 1,5 myń adam memlekettik grant aldy.
Sýbsıdıalanatyn jumys oryndaryna 82,5 myń adam ornalastyryldy. Áleýmettik jumys oryndarymen 11,4 myń, jastar praktıkasymen 8,6 myń, qoǵamdyq jumystarmen 61,1 myń adam qamtyldy. «Alǵashqy jumys orny» jobasy aıasynda 1,1 myń, «Urpaqtar kelisimsharty» jobasy aıasynda 138 adam, «Kúmis jas» jobasy aıasynda 226 adam jumyspen qamtyldy.
Eske salaıyq, buǵan deıin halyqty jumyspen qamtýǵa arnalǵan sharalar Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda júzege asyryldy. 2021 jyly baǵdarlamaǵa 651,8 myń adam qatysty.
Memlekettik baǵdarlamaǵa qatysýshylar turaqty jáne sýbsıdıalanatyn jumys oryndarymen qamtyldy. Sondaı-aq olarǵa kásipkerlikti damytý úshin mıkronesıe men qaıtarymsyz memlekettik grant berilip, qoldaý kórsetildi. Qysqa merzimdi kýrstarda jáne kásiptik-tehnıkalyq uıymdarda oqytyldy.
Budan bólek, «Eńbek» baǵdarlamasyndaǵy baǵyttardyń biri aıasynda jumys kúshi kóp aımaqtardan jumys kúshi jetispeıtin aımaqtarǵa kóshirildi.