«Dos-Muqasan» ansambliniń negizin qalaýshy jáne onyń alǵashqy jetekshisi Dosym Súleev óziniń 1974 jylǵy gıtarasyn XIII qysqy qaıyrymdylyq balynyń aýksıonyna tapsyrdy, dep habarlaıdy Almaty-akshamy.kz QazAqparatqa silteme jasap.
Onyń aıtýynsha, búginge deıin halyq súıip tyńdaıtyn «Jan dosym» ániniń mýzykasy dál osy gıtaramen jazylǵan.
«Biz bul gıtarany stýdent kezimizde aýylsharýashylyq jumystarynan tapqan eńbekaqymyzǵa satyp aldyq. Ol kezde jataqhanada turdyq. Onda elektr gıtara nemese fortepıano kirgize almaıtynbyz. Sondyqtan, qarapaıym gıtara satyp aldyq. Bul aspappen jataqhanada birge turǵan qyzdarǵa arnap án aıtatynbyz. Bizde úsh gıtara boldy. Bul – bizdiń sońǵy satyp alǵan aspabymyz», - dedi Dosym Súleev.
Ol osy gıtarany oǵan Máskeýge oqýǵa keter kezde mýzyka ónerin umyt qaldyrmas úshin ansámbl músheleri syıǵa tartqanyn atap ótti. Bul ýaqyttarda Dosym Súleevtiń «Toı jyry», «Almaty túni» sıaqty ánderi tyńdarmandar arasynda tanylyp úlgergen edi. Keıin Máskeýde júrip, joldastary syılaǵan osy aspappen «Jan dosym» ánin jazǵan
«Eger adam jastarǵa, balalarǵa jáne olardyń bolashaǵyna mán bermese, onda onyń aqyly joq. Al eger, balalarǵa aıaýshylyq, janashyrlyq tanytpasa, onda onyń júregi joq. Sondyqtan, men osy sharaǵa qatysyp otyrmyn. Ansámbldiń birinshi jetekshisi retinde top atynan biz úshin jádigerge aınalǵan zattardy tapsyrǵym keledi. Ony «Bolashaq» qory óz aýksıonynda naqty qunynan qymbat baǵaǵa satyp, túsken aqshany asa aýyr syrqattary bar balalardyń emine baǵyttaıdy», - dep toqtaldy Dosym Súleev.
«Bolashaq» qaıyrymdylyq qorynyń málimetinshe, 10 jyl ishinde 800 mln teńgeden astam qarajat jınalyp, oǵan 70 mamandandyrylǵan ońaltý mekemesi men 46 ınklúzıvti qoldaý kabıneti ashylǵan. Sondaı-aq, aýtızm jáne basqa da damý erekshelikteri bar 700-den astam bala men turmysy nashar otbasylardyń balalaryna kómek kórsetilgen.
Aıta keteıik, Dosym Súleevtiń gıtarasy 8 jeltoqsanda Astanada ótetin XIII qysqy qaıyrymdylyq balynda aýksıonǵa shyǵarylady.