Talantty jas qalamger ári sýretshi Ilás Iýsýfjanovtyń «Kereı men Jánibek» atty komıksi jaryq kórdi. Qazaq jáne orys tilinde shyqqan komıkstiń tanystyrylymy búgin Almatyda ótti dep habarlaıdy Almaty-aqshamy.kz.
Komıks janry elimizde kenjelep qalǵan janr ekeni málim. Sondyqtan da Ilás Iýsýfjanov sekildi jas talanttardyń atalǵan janrda eńbektenip, qazaq memlekettiligine qatysty tarıhı derekterdi jastarǵa meılinshe ótimdi tásilmen jetkizýi aıryqsha mánge ıe. Komıkstiń tanystyrylymyna jınalǵan qaýym pikiri de osyǵan toptasty.
Áýezov aýdanynda ótken ádebı sharaǵa Almaty qalalyq ákimdigi men Áýezov aýdany ákimdiginiń resmı ókilderi, qalamger jazýshylar men zıaly qaýym ókilderi qatysty. Sondaı-aq, avtordy qoldaýǵa onyń qatarlas jastary, Ahmet Jubanov atyndaǵy mýzykalyq mektebiniń Giovani Talenti kameralyq orkestri, ózge de ónerpazdar qatysty.
Almaty qalasy ákiminiń orynbasary Arman Qyryqbaev pen Áýezov aýdany ákimi Abzal Egemberdıv jas avtorǵa arnaıy quttyqtaý hatyn joldady, óz qoldaýlaryn jetkizdi. Resmı quttyqtaýlarda mádenı, tarıhı qundylyqtardy jastarǵa ótimdi tásilmen nasıhattaýdyń mańyzdylyǵyna aıryqsha toqtalǵan. Bul jaǵynda nátıjeli eńbek etken avtorǵa shyǵarmashylyq tabys tilegen.
Qazaqstan Jazýshylar odaǵy tóraǵasynyń birinshi orynbasary Nurjan Qýantaıuly da qalamgerler ordasynyń sálemin jetkizip, Ilásty óz qatarlaryna qabyldaǵanyn súıinshiledi. Osylaısha Ilás Iýsýfjanov Qazaqstan Jazýshylar odaǵynyń eń jas múshesi atandy. Buǵan qosa, komıks avtory «Beıbitshilik álemi» halyqaralyq birlestigi jaǵynan «Qazaqstan Bolashaǵy» tósbelgisimen marapattaldy.
Áýezov aýdany Mádenıet jáne tilderdi damytý bóliminiń basshysy Baný Manapova jýrnalıserge: «Jastar arasynda ulttyq qundylyqtardy, tarıhymyzdy nasıhattaýda «Kereı men Jánibek» komıksi sekildi eńbekterdiń tıgizer kómegi mol. Sebebi, ol jastardyń qabyldaýyna jeńil jáne yńǵaıly. Sol úshin biz avtordy osy eńbegimen quttyqtaımyz, ári shyǵarmashylyǵyna qoldaý kórsete bermekpiz», – degen pikirimen bólisti.
Avtor jaıly birer sóz:
Ilás Iýsýfjanov – ádebı ortaǵa Ilás Iýsýf degen qalamatymen tanylyp kele jatqan jaz jazýshy. Buǵan deıin de birneshe eńbekteri jaryq kórip úlgirgen bolatyn. Ol «Qazaqstandyq eń jas qalamger» retinde jergilikti Gınnes rekordtar kitabyna da engen.