Telegram arnalarynyń birinde 5G tehnologıasy isikter, nevrologıalyq problemalar týdyrady, ımýndyq jáne reprodýktıvti júıege zıan keltiredi degen vıdeo tarady.
Habarlamaǵa sáıkes, «uıaly baılanys baǵanalary aımaǵynda qaterli isik aýrýy qalypty deńgeıden shamamen 3-4 ese joǵary» delingen, dep habarlaıdy Almaty-akshamy.kz Stopfake.kz
Vıdeo Kalıfornıa Mı isikteri qaýymdastyǵy ókiliniń atynan shyqqan. Bul 2009 jyly qurylǵan jeke menshik uıym. Qaýymdastyq músheleri uıaly telefondar qaterli isik aýrýyn týdyrady dep málimdegen. Alaıda, muny joqqa shyǵaratyn zertteýler kóp.
2022 jyly Journal of the National Cancer ınstıtýtynda Ulybrıtanıanyń mıllıon turǵyny qatysqan eksperımenttiń nátıjeleri jarıalandy.
Ǵalymdar radıojıilik sáýlelenýiniń áserin zerttedi. Qorytyndysy anyq: uıaly telefondy paıdalaný men mı isiginiń arasynda baılanys joq.
5G jelisi paıda bolǵannan keıin kalıfornıalyq qaýymdastyq oǵan da belsendi qarsylyq tanyta bastady. Odan basqasy da bar. 2019 jyldan beri 5G týraly qastandyq teorıasy paıda boldy. Ony jaqtaýshylar tehnologıa adamdardy óltirý úshin ádeıi jasalǵan dep málimdedi.
5G – keń jolaqty uıaly jeliler úshin qoldanylatyn eń jańa tehnologıalyq standart. Uıaly baılanystyń besinshi býyny joq jerden paıda bolǵan joq, ol 3G men 4G almastyrady. 5G ereksheligi – joǵary júkteý jyldamdyǵy, derekterdi jiberýge az ýaqyt jumsalady jáne álem boıynsha paıdalanýshylardy barynsha kóp qosý múmkindigi. Tolqyndar men jıilikter de burynǵy, Massive MIMO jáne Beam Forming tehnologıalary qoldanylady.
Avstralıanyń onkologıalyq keńesiniń portalynda 5G tehnologıasy uıaly telefondar men bazalyq stansıalar arasyndaǵy baılanys úshin qoldanylatyndyǵy jazylǵan. Bul – radıojıilik elektromagnıttik energıa. Ol DNQ-ǵa zaqym keltirmeıtin ıondaýshy emes sáýlelenýdiń bir túri.
Jańa býyndaǵy jeliler adam densaýlyǵyna keri áser etetinine eshqandaı dálel joq, delingen DDU saıtynda.
Eýroparlament komısıasy 2021 jyly 5G tehnologıasy adamdar úshin qaýipsiz dep málimdedi.
2023 jyldyń naýryz aıynda 5G Qazaqstanda engizile bastady. Alǵashqy bazalyq stansıalar Almaty men Shymkentte ornatyldy.
5G paıdalanylǵan kezeńde ǵalymdar zertteý júrgizýdi toqtatqan joq. Búgingi tańda bedeldi derekkózderderdiń eshqaısysynda jańa tehnologıa densaýlyqqa qaýipti dep habarlanǵan joq. Demek, Telegram arnasyndaǵy jarıalanym – feık.
Tehnologıalyq progresti kóbinese qarapaıym adamdar ǵana emes, ǵalymdar da jaqtyrmaıdy. Máselen, XIX ǵasyrda temirjol jelisiniń damýy. 1837 jyly Bavarıa koróldik medısınalyq keńesi «temirjol qurylysy halyqtyń densaýlyǵyna zıan tıgizedi» dep sanaǵan. Sol kezdegi ǵalymdardyń pikirinshe, jyldam qozǵalystan jolaýshylarda mı aýrýyna ákep soǵady.