Bolashaqqa salynǵan ınvestısıa. Qazir Almatyda arnaıy mektepke deıingi bilim berý oryndarynyń pedagogtary úshin uıymdastyrylyp jatqan trenıgterdi osylaı ataýǵa bolady. Atalǵan sala boıynsha otandyq jáne sheteldik mamandar usynys etilgen trenıg sabaqtary Ó.Á.Joldasbekov atyndaǵy Stýdentter saraıynda ótip jatyr dep habarlaıdy Almaty-akshamy.kz.
15 qarashadan bastalǵan aýqymdy trenıgke atalǵan sala boıynsha eń úzdik otandyq jáne sheteldik sarapshylar usynys etilgen. AQSH, Ispanıa, Shvesıa, Fınlándıa, Germanıa, Norvegıa, Ulybrıtanıa, Reseı jáne taǵy basqa da 10-nan astam elden 30-dan astam sarapshy sabaq berýde.
Otandyq jáne sheteldik spıkerler qatarynda mektepke deıingi bilim berý salasynyń eń úzdik sarapshylary, pedagogtary men praktıkteri, sondaı-aq, balabaqshalardyń dırektorlary da bar. Olar qazirgi kezdegi balabaqshalarda bilim berýdiń eń jańa ári ozyq tájrıbelerimen bólisedi. Olardan Almatydaǵy 192 mektepke deıingi bilim berý oryndarynan 2210 pedagog sabaq alýda.
«Basty maqsatymyz – qalamyzdaǵy mektepke deıingi bilim berý mekemelerindegi mamandardyń biliktiligin arttyrý», – deıdi aýqymdy shara týraly pikirimen bólisken Almaty qalalyq Bilim basqarmasynyń Mektepke deıingi bóliminiń bas mamany Uljan Batyrbaeva. Ol jáne bul jobadan bizdiń mamandar sabaqtarǵa qatysyp qana qoımaı, ózara pikir almasý arqyly jańa ıdelar tabady degen senimde.
«Bul sabaqtar 156 akademıalyq saǵatqa qarastyrylǵan. Onda otandyq jáne sheteldik spıkerler atalǵan saladaǵy jańa metodıkalyq ınovasıalyq tehnologıalardyń qoldanylýyn bizdiń mamandarǵa úıretip, bizde ǵana emes álem elderinde osy salada qandaı jańalyqtar bolyp jatqanyn jetkizse deımiz. Aıtalyq, ózge elderde balabaqshalar úshin ata-analardan qandaı talaptar qoıylýda, ári ony qalaı sheship jatyr degen suraqtardy da qarastyrýdy kózdedik», – deıdi bas maman Uljan hanym.
Aıta keteıik, bul joba Almaty qalasyn damytýdyń 2025 jylǵa deıingi bas jospary aıasynda ótýde. Ári mektepke deıingi bilim berý salasynyń mamandaryna arnalǵan bundaı aýqymdy joba elimizde alǵash ret ótkizilýde. Balabaqshalardaǵy bilim berý sapasyn joǵarlatý, ondaǵy mamandardyń kásiptik bilimin jetildirýde bul jobanyń tıgizer paıdasy mol bolary anyq.
