Premer-Mınıstr Pfizer-diń óńirlik prezıdenti Patrık van der Loomen áńgime barysynda Qazaqstanda kompanıanyń barlyq bastamalary men ınvestısıalyq jobalaryn iske asyrýdyń mańyzdylyǵyn atap ótti. Atap aıtqanda, qazir Prevenar 20 vaksınasyn óndirýdi lokalızasıalaý boıynsha belsendi birlesken jumys júrgizilýde. Astanada KGIR-2023 sheńberinde joba boıynsha uzaqmerzimdi shartqa qol qoıyldy.

Qazaqstanda Prevenar 13 (aldyńǵy býyn) vaksınasyn qoldanǵan jyldary balalar arasyndaǵy pnevmonıamen syrqattanýshylyqtyń 50%-ǵa tómendegeni atap ótildi. Álıhan Smaıylov júzege asyrylyp jatqan joba aldaǵy ýaqytta da halyqty sátti ımmýndaýǵa yqpal etetinine senim bildirdi.

Sondaı-aq Úkimet basshysy kompanıanyń respýblıkada Kavkaz, Ortalyq Azıa jáne Mońǵolıa elderin qamtıtyn jańa aımaqtyq keńsesin ashý josparyn quptady.

«Qazaqstan ınvestısıa men ozyq tehnologıalar tartýǵa múddeli. Pfizer preparattar óndirisin lokalızasıalaý memleketimizdiń farmasevtıka salasynyń damýyna serpin beretinine senimdimin», — dedi Premer-Mınıstr.

Avstrıalyq Lasselsberger Group kompanıasynyń basshysy Iozef Lasselsbergermen kezdesýde Qazaqstan aýmaǵynda keramıkalyq plıtalar, qurǵaq qospalar men jelim shyǵaratyn zaýyttar salý máseleleri talqylandy.

Álıhan Smaıylov elimizde qurylys salasynyń qarqyndy damýy qurylys materıaldaryna degen suranystyń artýyna tikeleı áser etetinin atap ótti. Jalpy, jyl basynan beri elimizde 13 mln sharshy metrden astam turǵyn úı paıdalanýǵa berildi, bul ótken jylmen salystyrǵanda 13,8%-ǵa joǵary.

«Qazaqstan Lasselsberger sıaqty strategıalyq ınvestorlarmen uzaq merzimdi yntymaqtastyqty damytýǵa nıetti. Úkimet jańa ınvestısıalyq jobalardy júzege asyrýǵa tıisti kómek kórsetýge daıyn», — dedi Premer-Mınıstr.

Al Rajhi International for Investment kompanıasynyń bas dırektory, Qazaqstan-Saýd İskerlik keńesiniń teń tóraǵasy Ahmed Álı ál-Dahılmen kezdesý barysynda aýyl sharýashylyǵy salasyndaǵy yntymaqtastyqtyń ózekti máseleleri talqylandy.

Úkimet basshysy atap ótkendeı, Qazaqstan agroónerkásiptik keshen júıelerin jańǵyrtýǵa jáne aýyl sharýashylyǵy marketıńiniń ınovasıalyq baǵdarlamalaryn engizýge múddeli.

«Osy turǵyda birlesken jobalardy júzege asyrý úshin sizdiń kompanıańyzben yntymaqtastyq týraly memorandýmǵa qol qoıý – áriptestigimizdi nyǵaıtýdaǵy mańyzdy qadam. Qazaqstannyń agroónerkásip keshenin odan ári damytý úshin úlken áleýeti bar. Memleket óz tarapynan aýyl sharýashylyǵy sýbektilerine belsendi qoldaý kórsetip keledi», — dedi Álıhan Smaıylov.

Kezdesýlerdiń qorytyndysy boıynsha ózara tıimdi yntymaqtastyqty nyǵaıtý úshin tyǵyz is-qımyldy jalǵastyrý týraly ýaǵdalastyqtarǵa qol jetkizildi.

Esterińizge sala keteıik, VI Jahandyq ınvestısıalar jónindegi qazaqstandyq dóńgelek ústel aıasynda elimizde jańa jobalardy júzege asyrýǵa ınvestorlarmen 26 memorandým men komersıalyq qujattarǵa qol qoıylǵan bolatyn. Kelisimderdiń jalpy somasy $1,6 mlrd-ty quraıdy. Jobalar ekonomıkanyń agroónerkásiptik kesheni, taý-ken jáne metalýrgıa ónerkásibi, densaýlyq saqtaý, jeńil ónerkásip, mashına jasaý, bilim berý jáne t.b. salalardyń damýyna oń yqpal etedi.