Almaty ákimdigi «Almaty – adamdar úshin jahandyq qala» baǵdarlamasyn ázirledi.
Almaty ákimdigi «Almaty – adamdar úshin jahandyq qala» baǵdarlamasyn ázirledi. Onda megapolısti 2025 jylǵa deıin damytýdyń negizgi basymdyqtary men 2030 jylǵa deıingi orta merzimdi perspektıvalar kórsetilgen. Qala turǵyndary baǵdarlamamen tanysyp, óz usynystaryn «Almatyny damytý ortalyǵynyń» saıtynda 2022 jyldyń 1 shildesine deıin qaldyra alady. Bul týraly Almaty qalasy Qoǵamdyq keńes múshesi Borıs Djaparov pikir bildirdi, dep habarlaıdy Almaty-akshamy.kz.
«Almaty qalasynyń 2025-2030 jyldarǵa deıingi orta merzimdi damý josparlarynyń jobasymen qala jurtshylyǵyn habardar etken qala ákimi Erbolat Dosaev negizgi basymdylyqtardyń qataryna qoǵamdyq transport máselelerin qoıyp otyr. Kópshiliktiń kóńilinen shyǵatyn josparly mejeler qaladaǵy qoǵamdyq kólikterdiń barlyq túrlerin qamtyǵan desek, qatelespesbiz. Ásirese, «Almaty arena» men «Halyq arena» arasyn Tóle bı kóshesi arqyly qosatyn jeńil relsti transport, jańadan ashylatyn elektr kúshi jáne gazben júretin 5 avtobýs parkteri men 5 gaz quıý beketterin, júzdegen jańa avtobýstar, qala kire beristerindegi 4 jańa parkıng alańdary men kólik-habtarynynyń qurylysy, qala ortalyǵynan Úlken Almaty aınalmaly avtojolyna tikeleı shyǵatyn 10-ǵa jýyq radıaldy kóshelerdi jáne taǵy basqa joldardy salý, t.b.
Árıne, jańa múmkindiktermen qatar jańa máseleler men kedergiler de týyndaıtyny anyq. Sol sebepten qala ákimi qala turǵyndaryna usynylyp otyrylǵan jobalardy belsene talqylap, kelesi aıdyń 5-ne deıin óz usynystaryn resmı bildirýge shaqyrdy.
"Birge pishken ton kelte bolmas" degen. Osyǵan oraı barsha almatylyqtardy qoǵamdyq kóliktiń aldymyzdaǵy 8 jylǵa arnalǵan damý josparymen jete tanysyp, óz oılaryńyzdy ashyq bildirýge shaqyramyz", – dedi ol.
Aıta keteıik, Almaty ákimdigi «Almaty – adamdar úshin jahandyq qala» baǵdarlamasyn ázirledi. Joba jeti bólimnen turady, olar: «Jaıly qalalyq orta», «Turaqty ekonomıkalyq ósý», «Basqarylatyn ýrbanızasıa», «Áleýmettik ornyqtylyq pen turaqtylyq», «Jasyl Almaty», «Smart sıtı», «Qaýipsiz qala».
Almatyny keńistiktik damytýdyń negizgi mindeti – jaıly qalalyq orta qurý jáne qalanyń barlyq aýdandarynda ómir súrý sapasyn arttyrý. Ol úshin úsh basym bastama aıqyndaldy: Almatyny kóportalyqty damytý, qoǵamdyq kóliktiń damyǵan júıesi jáne aýdandardyń baılanystylyǵy, jańa tarıftik saıasatty engizý jáne shyǵyndardy azaıtý arqyly TKSH qyzmetteriniń sapasyn jaqsartý.