Kúdiktiler qamaýǵa alyndy.
Almaty polısıasy esirtki óndirý jáne satýmen aınalysqan topty ustady, dep habarlaıdy Almaty-akshamy.kz Polisia.kz-ke silteme jasap.
Almatynyń esirtki qylmysymen kúresýshileriniń nazaryna 20 jastaǵy M.esimdi azamat pen 21 jastaǵy A. esimdi azamatsha tústi. Olardy qalanyń Túrksib aýdanyndaǵy Maılın kóshesinde ustady.
«Kúdiktilerdiń qolynda birneshe paket boldy, onyń ishinde ósimdik tektes zaty bar 120-dan astam býma jáne shópti dozaǵa bólip, oraýǵa arnalǵan jabdyq bar. Tárkilengen zattaı aıǵaqtar boıynsha sot-hımıalyq saraptama taǵaıyndaldy. Juptyń tek esirtki taratýmen ǵana emes, óndirýmen de aınalysatyny anyqtaldy. Sońǵy is-áreketterinde olardyń sybaılastary bar. Olar da jup. Er adam 35 jasta, onyń qurbysy ári «áriptesi» nebári 23-te. Olar Almaty oblysy Talǵar aýdany aýmaǵyndaǵy óz úıinde qylmystyq óndiristi bastaǵan. Osy maqsatta turǵyn bólmelerdiń birin paıdalanǵan. Ol jerde jup óz aımaqtarynda ósirilgen shıkizatty óńdegen», – dedi Almaty qalalyq PD Esirtki qylmysyna qarsy kúres basqarmasynyń bastyǵy Erlan Álmaǵambetov.
QR QK-niń 296-baby 4-bóliginde kózdelgen qylmys belgileri boıynsha esirtki zerthanasynyń jumysynda paıdalanylǵan quraldar, daıyn shıkizat, butalar tárkilenip, qylmystyq is materıaldaryna tirkeldi.
«Sonymen qatar, sot-hımıalyq saraptamaǵa nashaqorlar arasynda «sańyraýqulaq» dep atalatyn sur zat jiberildi. Al kúdiktiler qamaýǵa alyndy. Esirtki zerthanasy joıyldy. Qazirgi ýaqytta áshkerelengen esirtki satýshylardyń turaqty «klıentteriniń» sheńberi qurylýda, – dedi Erlan Álmaǵambetov.