Bul – jaqsy dástúrge aınalǵan jyl saıynǵy shara.
İİO ardageri, otstavkadaǵy polısıa polkovnıgi Rýslan Nasyrbaev jas iz kesýshilerge 90-jyldardyń aıaǵyndaǵy atyshýly qylmystar, sonyń ishinde adam jegishterdiń ustalýy týraly qyzyqty oqıǵalardy aıtyp berdi, dep habarlaıdy Almaty-akshamy.kz Polisia.kz-ke silteme jasap.
Sonymen qatar, qyzdy zorlaǵan qylmyskerdi ustaý úshin 13-qabattan sekirgen polısıa podpolkovnıgi Baqytjan Bákirov jas tártip saqshylarynyń aldynda sóz sóıledi.
«Shara únemi İİO ardagerleriniń qatysýymen ótedi. Bul joly adamdardy qutqarýda, aýyr qylmystardyń jolyn kesýde jáne ashýda erekshe kózge túsken polısıa qyzmetkerlerin qurmetteýdi de oraılastyrdyq. Maqsatymyz – jas tártip saqshylaryn patrıottyq jáne Otanǵa degen súıispenshilik rýhynda tárbıeleý, sonymen qatar ishki ister organdarynyń ımıjin kóterý. Óskeleń urpaq erjúrek áriptesterimizden úlgi alýy kerek. Bul polısıa qyzmetkerleri ómiri men densaýlyǵyna qaramastan, elimizdiń qaýipsizdigi men turaqtylyǵy jolynda Otanǵa aıanbaı qyzmet etýde. Olarda zamanaýı polısıa qyzmetkeriniń boıynda bolýy tıis qasıetter bar: kásipqoılyq, jaýaptylyq, ádildik», – dedi Almaty qalalyq polısıa departamenti bastyǵynyń orynbasary Oljas Myrzabekov.