Bıyl jol jumysshylarynyń jalaqysy 30% - ǵa kóterildi.
Memleket basshysynyń birtutas avtojol kompanıasyn qurý jónindegi tapsyrmasy aıasynda QazAvtoJol ulttyq kompanıasy úsh negizgi baǵyt boıynsha júıeli jumys júrgizýde, dep habarlaıdy Almaty-akshamy.kz
Birinshi. Kútip-ustaý jumystarynyń sapasyn arttyryp, jol qyzmetkerleriniń jumysyna qolaıly jaǵdaı jasap, qoldaý maqsatynda qosymsha jańa 150 birlik arnaıy tehnıka alyndy. Olardyń qatarynda jol mashınalary, shnekorotorlar, tıegishter, avtogreıderler, MTZ jáne t.b. bar. Jańa tehnıka qozǵalys qarqyndylyǵy joǵary jol ýchaskelerine, sondaı-aq qar basý qaýpi joǵary ýchaskelerge jiberildi. Sonymen qatar, qoldanystaǵy tehnıka úshin 60 qosymsha jabdyq satyp alyndy. Kútip ustaý jumystary jyl boıy júrgiziletindikten, jańa tehnıkany qalǵan úsh mezgilde de qoldanýǵa bolady.
Ekinshi. Jol qyzmetkerlerin materıaldyq turǵyda yntalandyryp, kadrlardyń turaqsyzdyǵyn aldyn alý úshin 2023 jyldyń basynan beri jol jumysshylarynyń jalaqysy 30% - ǵa kóterildi.
Úshinshi. Qyzmetkerlerdiń eńbek jaǵdaıyn jaqsartyp, qaýipsizdikti arttyrý úshin jol-paıdalaný qyzmetteriniń ǵımarattaryn jóndeý jumystarymen qamtý josparlanyp otyr.
Joǵaryda atalǵan baǵyttar boıynsha qolǵa alynǵan jumys bıyl jalǵasyn tappaq.
El óńirlerindegi QazAvtoJolǵa qarasty jol qyzmetteri táýlik boıy kúsheıtilgen rejımde qysqy kútip-ustaý jumystaryn jalǵastyrýda. Mamandar júrgizýshilerdi qys mezgilinde jol boıynda erekshe saq bolýǵa, aýa-raıy boljamyn jiti qadaǵalap, eskerýge jáne arnaıy tehnıkanyń jumysyna qosymsha kedergi týdyrmaýǵa shaqyrady.
Jolda qandaı da bir shtattan tys jaǵdaı týyndasa 1403 qysqa nómiri boıynsha QazAvtoJoldyń biryńǵaı táýlik boıy jumys isteıtin baılanys ortalyǵyna júginý qajet.