Almaty oblysy Qarasaı aýdanynda aýyl turǵynynan eki jaryq-shýly granata tárkilendi
Jedel izdestirý is-sharalaryn júrgizý barysynda Qarasaı aýdandyq PB krımınaldyq polısıa bóliminiń qyzmetkerleri Abaı kentiniń turǵyndarynyń biri granatany saqtaǵany týraly jedel aqparat aldy, dep habarlaıdy Almaty-akshamy.kz Polisia.kz-ke silteme jasap.
Tekserý barysynda polısıa qyzmetkerleri aqparatty rastady. Kúdikti, 26 jastaǵy jergilikti turǵyn, granata saqtaǵanyn moıyndady jáne kórshi aýlada eki jaryq-shýly granatany jasyrǵan jerin kórsetti. Er adamnyń aıtýynsha, Almaty qalasyndaǵy tártipsizdik kezinde “polıseılerge laqtyr” dep beıtanys adam berip ketken. Ol granatalardy úıine alyp kelip, jasyrǵan.
Atalǵan fakt QR QK-niń 287-baby 3-bóligi boıynsha “Atys qarýyn, oq-dárilerdi, jarylǵysh zattardy nemese jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý” SDTBT-ne tirkeldi. Balıstıkalyq saraptama taǵaıyndaldy.