Alapat órtten zardap shekkender joq
Almaty oblysynyń Eńbekshiqazaq aýdanynda taý bókteri órtenip 4 myńnan astam halqy bar eldimekenge qaýip tóndi. Qyzyl jalyn qasqaǵym sátte 2 gektar aýmaqqa jaıylyp, jaıqalǵan jasyl jelektiń kúli kókke ushty, dep habarlaıdy Almaty-akshamy.kz Almaty.tv-ge silteme jasap.
Azat aýylyndaǵy alapat órt týraly habar jetkende birden tótenshe jaǵdaılar qyzmeti mingen kóliktiń izine tústik. Oqıǵa ornyna jetkende, eldimekenge tıip turǵan taý jotasynyń órtenip jatqanyn kórdik. Qoıý qara tútin, lapyldaǵan qyzyl jalyn.
Jotada tutanǵan qyzyl jalyn birden tarap, betkeı tusy túgel derlik kúlge aınalyp ketti. Órtti sóndirýge tótenshelikterden bólek, aýyl turǵyndary da atsalysyp jatyr. Degenmen, qaýip áli seıilmedi. Bókterdegi buta men shóptiń qurǵaq bolýy órttiń tez taralýyna sebep boldy.
Órt shyqqan aýmaqqa jetý úshin shamamen 20-25 mınýttaı ýaqyt ketti. Munda shyǵýdyń ózi qıyn. Mundaǵy jaǵdaıdy aıtatyn bolsaq, órt tolyǵymen sóndi. Qaýip te seıildi. Mundaǵy órt sóndirýshiler moıynǵa artylǵan mindetti tolyq atqaryp, aýylǵa tóngen qaýiptiń betin qaıtardy.
«Órt 2 gektar aýmaqqa tarady. Biz sóndirý barysynda anyqtadyq. Endi bizdiń arnaıy mamandar taýdaǵy órttiń qaıdan shyqqannyn zertteıtin bolady. Eger bireýdiń qasaqana áreketi bolyp shyqsa, ol mindetti túrde jaýapqa tartylady», – dedi Eńbekshiqazaq aýdandyq TJB bastyǵy Rahman Karımjan.
Alapat órtten zardap shekkender joq. Aıta keteıin, jyl basynan beri bir Almaty oblysynyń ózinde 200-den astam dala órti tirkelgen.