Ushaq bıletiniń quny 7,8 mln teńgege deıin qymbattap ketken
Áleýmettik jelide Máskeýden Almatyǵa qatynaıtyn ushaq bıletiniń quny 7,8 mln teńgege deıin qymbattap ketkeni týraly aqparat paıda boldy. Osyǵan qatysty Azamattyq avıasıa komıteti túsinikteme berdi, dep habarlaıdy Almaty-akshamy.kz.
«Áleýmettik jelilerde Máskeý – Almaty baǵyty boıynsha bıletterdiń baǵasyna qatysty taratylyp jatqan aqparattaǵy bıletterdiń quny Dýbaı arqyly Máskeý – Dýbaı ("Emirates" áýekompanıasy) jáne Dýbaı – Almaty ("Eır Astana"áýekompanıasy) marshrýty boıynsha tranzıttik reısterdi eskere otyryp kórsetilgenin habarlaımyz. Al Máskeý – Almaty jáne Dýbaı – Almaty baǵyttary boıynsha qazaqstandyq áýe kompanıalardyń tikeleı reısterinde tarıfter ózgermegenin atap ótý qajet», -delingen QR IIDM Azamattyq avıasıa komıteti taratqan málimette.
Mysaly, 2022 jylǵy 21 qyrkúıek saǵat 18:00-degi jaǵdaı boıynsha:
• 2022 jylǵy 24 qyrkúıektegi Máskeý (Vnýkovo) – Almaty baǵyty boıynsha "SCAT" qazaqstandyq avıakompanıasynyń reısine bılet quny 253688 teńgeni jáne aǵymdaǵy jylǵy 29 qyrkúıektegi baǵasy 208078 teńgeni quraıdy.
• 2022 jylǵy 22 qyrkúıektegi Dýbaı-Almaty baǵyty boıynsha "Eır Astana" áýekompanıasynyń reısine bılet quny 334146 teńgeni quraıdy.
Aıta ketsek, 21 qyrkúıekte RF Prezıdenti Vladımır Pýtın elde ishinara mobılızasıa jarıalady.
Reseılik advokat Georgıı Malkov "FederalPress" agenttigine bergen suqbatynda Reseı zańdaryna sáıkes 18 jastan 65 jasqa deıingi barlyq er adamdar shetelge shyǵa almaıtynyn aıtty.
Alaıda Reseıde mobılızasıa sharalary qalaı uıymdastyrylatyny, ázirge belgisiz. Áskerı mindettilerdiń elden shyǵýyna tyıym salynǵany týraly da naqty aqparat joq.