Almaty ákimi Erbolat Dosaev pen TAV Airports Holding bas dırektory Serkan Kaptan Almaty halyqaralyq áýejaıynyń aǵymdaǵy máseleleri men ony damytý josparlaryn talqylady. Keńeste jańa halyqaralyq termınaldyń iske qosylýynan keıingi áýejaıdaǵy máseleler, sondaı-aq ınfraqurylymdy jaqsartý jáne qyzmet kórsetý sapasyn arttyrýǵa baǵyttalǵan sharalar qarastyryldy, dep habarlaıdy aqshamnews.kz
Kezdesý barysynda Erbolat Dosaev jańa termınaldyń josparlanǵan merzimnen eki aı buryn, ıaǵnı 2024 jyldyń 1 maýsymynda ashylǵanyn, bul jolaýshylardyń jaılylyǵyn arttyryp, qyzmet kórsetý deńgeıin jaqsartýǵa tıis bolǵanyn atap ótti. Alaıda, ashylǵannan keıin termınaldyń drenaj júıesindegi aqaýlar, eskalatorlardyń durys jumys istemeýi, júk berý kezinde kidirister, qabyrǵadaǵy jaryqtar jáne basqa da kemshilikter anyqtalǵan.
Qala basshysy bul kemshilikter jolaýshylardyń narazylyǵyn týǵyzǵanyn aıtyp, jaǵdaıdy túzetý úshin qabyldanǵan sharalardy talqylaýdy usyndy.
TAV Airports Holding bas dırektory Serkan Kaptan áýejaıdyń birqatar qıyndyqqa tap bolǵanyn, olardy sheshý úshin keshendi tásil qajet ekenin málimdedi. Onyń aıtýynsha, jańa termınaldaǵy anyqtalǵan kemshilikter tolyǵymen joıylǵan. Qazirgi ýaqytta drenaj júıesin qalpyna keltirý jáne ony qalalyq jelilerge qosý jumystary aıaqtalyp keledi. Sondaı-aq, ishki termınaldy qaıta qurý – tirkeý aımaqtaryn, kútý zaldaryn jáne júk berý aımaqtaryn keńeıtý, teletraptardy aýystyrý jumystary júrgizilýde.
Serkan Kaptan jolaýshylardyń qaýipsizdigi men jaılylyǵyn arttyrýǵa baǵyttalǵan birqatar josparlardy da atap ótti. Olardyń ishinde sol jaq ushý-qoný jolaǵyn tolyq qaıta qurý, perrondardy jáne muzǵa qarsy alańdy jańartý, aerodrom jabdyqtaryn jańartý, drenaj júıesindegi máselelerdi sheshý sekildi sharalar bar.
Keńeste kólik ınfraqurylymyndaǵy túıtkilder de qaraldy. Áýejaıdaǵy avtoturaq oryndary men kireberis joldardaǵy qıyndyqtar belgili bir kedergiler týǵyzady. Qarbalas ýaqytta áýejaıǵa kirý 45 mınýtqa deıin sozylýy múmkin, bul qoldanystaǵy jol ınfraqurylymyn qaıta qaraýdy talap etedi. Qazirgi ýaqytta áýejaıda 551 oryndyq 3 turaq aımaǵy ashylǵan. Bul máseleni sheshý úshin aldaǵy ýaqytta ınvestor 1000 oryndyq kópqabatty avtoturaq salýdy josparlap otyr.
Kezdesý sońynda taraptar Almaty halyqaralyq áýejaıynyń sapaly jumysyn qamtamasyz etý úshin tyǵyz yntymaqtastyqqa jáne qajetti is-sharalardy júzege asyrýǵa daıyn ekendikterin málimdedi.