6 qazan kúni Astana qalasynda respýblıkalyq «Zerdeli» oqý ortalyǵy óziniń 10 jyldyq mereıtoıyn atap ótti. Saltanatty shara barysynda ortalyqtyń negizin qalaǵan aǵaıyndy Yrysbek jáne Ójet Máýit úzdik ustazdarǵa páter sertıfıkaty men Dýbaıǵa demalys joldamasyn syıǵa tartty, dep habarlaıdy aqshamnews.kz
«Zerdeliniń 10 jyldyq mereıtoıy ustazdar kúnimen tuspa-tus keldi. Osyǵan oraı, 7 muǵalimge baspana alýǵa qoldaý kórsetýdi sheshtik. Buǵan deıin de 25 ustazymyzdyń úıli bolýyna kómektesken edik. Bul úrdis áli de jalǵasyn tabady. Ustazdyq qyzmetke ómirin arnaǵan jandar úshin qandaı qoldaý jasasaq ta laıyqty. Sonymen qatar, 15 adamǵa Dýbaıǵa demalys joldamasyn syıladym. Ótken oqý jylynda da Zerdelide qyzmet etken 100-ge jýyq ustazymyz osy joldamamen Dýbaıda demalyp qaıtqan», – dedi Yrysbek Máýit.
Qazirgi tańda Zerdeli ortalyǵy elimizdiń 18 oblysynda 41 oqý ortalyǵymen, 7 mektebimen jáne 50-ge jýyq bólimshesimen jumys isteıdi. Astananyń ózinde 500-ge jýyq pedagog qyzmet atqarady.
«Merekede ustazdarǵa sapaly ári adal eńbekteri úshin aqshalaı syıaqy men sońǵy úlgidegi aıfondar tabystadyq. Prezıdentimiz «Pedagog mártebesin kóterý – memlekettik saıasattyń mańyzdy bóligi» dep atap ótkendeı, biz ustazdarǵa qurmet pen materıaldyq qoldaýdyń qatar júrýin mańyzdy dep sanaımyz», – dep qosty kásipker-pedagog.
Merekelik keshke elimizdiń mádenıet jáne óner qaıratkerleri kelip, án men jyrdan shashý shashty. Qonaqtardyń qatarynda dástúrli ánshi Erlan Rysqalı men aqyn Qalqaman Sarın boldy.
Kerek derek
«Zerdeli» oqý ortalyǵy – daryndy balalarǵa arnalǵan bilim berý ortalyǵy. Sońǵy 10 jyl ishinde ortalyq elimizdiń eń iri bilim berý oryndarynyń birine aınaldy.