Premer-Mınıstr áleýmettik mańyzy bar taýarlarǵa 15% ústeme baǵanyń saqtalýyn baqylaýdy kúsheıtýdi tapsyrdy
2022 jylǵy 19 naýryzda Premer-Mınıstr Álıhan Smaıylovtyń tóraǵalyǵymen Memleket basshysynyń tapsyrmalaryn jáne Qazaqstan Respýblıkasyndaǵy áleýmettik-ekonomıkalyq jaǵdaıdy turaqtandyrý jónindegi jedel is-qımyl josparyn oryndaý boıynsha kezekti keńes ótti, dep habarlaıdy Almaty-akshamy.kz
Jyl basynan beri Qazaqstanda áleýmettik mańyzy bar azyq-túlik taýarlarynyń baǵasy 8%-ǵa ósti. Baǵanyń ósýi barlyq óńirlerde tirkeldi.
Óńirler boıynsha ótken aptada baǵanyń eń joǵary ósýi Batys Qazaqstan oblysynda 9,5%-ǵa, Aqtóbe oblysynda – 8,7%-ǵa, Pavlodar oblysynda – 7,1%-ǵa jáne Atyraý oblysynda – 6,7%-ǵa oryn alǵan.
QR Premer-Mınıstri Álıhan Smaıylov áleýmettik mańyzy bar azyq-túlik ónimderi baǵasynyń aıtarlyqtaı ósýine jol bergen birqatar óńir ákimderine eskertý jasady.«Oblysta jyl basynan beri de, bir apta ishinde de barlyq ÁMAT boıynsha baǵanyń ósýine jol berilgen, — dedi Álıhan Smaıylov BQO ákimine. — Bul halyqqa edáýir qıyn. Biz Oraldaǵy kóptegen dúkendi araladyq. Qant baǵasy bir jerde tómen, al bir jerde joǵary. Men adamdardy elimizdiń barlyq óńirine arnaıy joldadym. Keıbir saýda oryndarynda baǵa 20 paıyzǵa kóterilgen. Ústeme baǵany baqylaý kerek, ony eshkim qadaǵalamaı otyr».