Almatynyń Áýezov aýdanyna qarasty «Mamyr» yqshamaýdanynda turatyn Shynar Jaqypaqyn qazaqtyń ulttyq taǵamdarynyń biri – órmetóstikti daıyndaýdyń has sheberi.
Ómirin ustazdyqpen baılanystyrǵan ol búginde qaladaǵy №188 mektep-gımnazıada geografıa pániniń muǵalimi bolyp qyzmet atqarady. Jaqynda Shynar muǵalimder arasynda ótken «Uly dala tulǵalary. Uly dala esimderi» atty qalalyq baıqaýda İİ oryndy jeńip aldy. Jobalyq jumysyn «Ónege etem qyzyma ózgeshe astyń túr-túrin» dep atapty. Naýryz merekesi qarsańynda biz Shynar Nurdáýletqyzyn marapatymen quttyqtap, jeńimpaz atanýyna sebepker bolǵan ulttyq taǵamdy kimnen úırengenin jáne onyń daıyndalý ádisin suradyq.
– Bul taǵamdy ázirleýdi maǵan anam úıretti. Al anam ájemnen úırengen. Órmetóstik órgende saýsaqtaryna kóz ilespeıtin. Qyzyǵatynmyn. Daıyndaý tásilin bala kezimnen kórip óskendikten bolar, keıinnen anamnyń aıtýymen órmetóstik órýge tez mashyqtanyp aldym. Ony búginde qyzym Ajarǵa úıretip júrmin. Osy sátti paıdalanyp, men barlyq isime qoldaý kórsetip, únemi tilekshi bolyp otyratyn anam Sypaıy Jolseıitqyzyna alǵys bildirgim keledi. Anam – meniń tirshiligimniń gúli, taǵdyrymnyń tamyry, – deıdi ol. Shynardyń anasynan úırengen taǵamy bul ǵana emes. Ol qoıdyń ultabarynan da erekshe as – «úırek» jasaýdy da jaqsy meńgergen. Ulttyq taǵamdarǵa qatysty aıtary kóp ustaz áńgimesin ári qaraı bylaı dep jalǵastyrdy:
«Bizde qazaqtyń taǵamdary óte maıly, densaýlyqqa zıan degen bir túsinik bar. Meniń oıymsha, bul durys pikir emes. Máselen, órmetóstikti úıge kúıeý bala kelgende qurmet belgisi retinde aldyna qoıǵan. Ol – qoıdyń tós etinen jasalyp, syrty ash ishekpen óriletin qazaqtyń ulttyq taǵamy. Ókinishtisi, qazir kóp adamdar qoı soıǵanda onyń ishek-qarnyn tastaı salýǵa daıyn turady. Al ishek-qarynda adam aǵzasyna paıdaly zattar kóp. Onda jastyqty saqtaıtyn kollagen men elastan sekildi dárýmender bar. Meniń armanym – qazaqtyń ulttyq taǵamdaryn shetelderden qonaqtar arnaıy izdep keletindeı deńgeıge jetkizý. Sondyqtan ulttyq taǵamdardy Naýryzda ǵana dastarqanymyzǵa qoımaı, kúndelikti ishipjeýdi ádetke aınaldyrsaq, quba-qup», – dedi ol sóz sońynda.
Biz qazaqtyń umyt bola bastaǵan erekshe taǵamdarynyń birin ázirleýdi nasıhattap júrgen Shynar Nurdáýletqyzyna aldaǵy isine sáttilik tiledik.