Alataý aýdanynda 18 kanalızasıalyq sorǵy stansıasyn salý qajet.
Qala ákimi Erbolat Dosaevtyń Alataý aýdanynyń turǵyndarymen kezdesý ótip jatyr, dep habarlaıdy Almaty-akshamy.kz.
Qazirgi ýaqytta «Aqbulaq», «Ójet» jáne «Samǵaý» 3 shaǵyn aýdan boıynsha sýmen qamtý jelileri salynyp, olardy iske qosý jumystary júrgizilýde.
Qosymsha 6 shaǵyn aýdanda jalpy uzyndyǵy 207 km bolatyn ortalyq sýmen qamtý jáne sý burý jelileri salynyp jatyr.
"Osy jyldyń sońyna deıin Shapaǵat, Qarasý, Alǵabas shaǵyn aýdandarynyń turǵyndary sý qubyry jelilerine qosyla alady.
Sondaı-aq, 10 kanalızasıalyq sorǵy stansıasy jáne Shańyraq-1 shaǵyn aýdanynda (3500 abonent, 100 km) sýmen jabdyqtaý jáne sý burý jumystaryn tezdetip aıaqtaýdy josparlap otyrmyz. Qalǵan shaǵyn aýdandar boıynsha jumystardy 2023 jyldyń jeltoqsan aıynda aıaqtaý josparda", - dedi qala ákimi.
Sonymen birge, osy jyldyń qyrkúıek aıynda «Terekti» shaǵyn aýdanynda 44 km sý jáne 32 km kanalızasıa jelileriniń qurylysy bastalady. Bul jumystar 2024 jyldyń jeltoqsanyna deıin júrgiziledi.
Búginde sý kanalızasıa júıesiniń jumys isteýi úshin aýdanda 18 kanalızasıalyq sorǵy stansıasyn salý qajet.
Almaty qalasynyń ákimdigi osy stansıalardy salý jáne iske qosý úshin kedergi keltiretin qurylystar ornalasqan jer ýchaskelerin kezeń-kezeńimen alý týraly sheshim qabyldandy.
Qazirgi ýaqytta Shańyraq-2 shaǵyn aýdanynda 4 ýchaskeni alý jumystary júrip jatyr. 3 ýchaskede jumystar júrgizilýde, jabdyqqa tapsyrys berildi. Qurylys-montajdaý jumystaryn osy jyldyń jeltoqsan aıynda aıaqtaý kózdelgen.
Kanalızasıalyq sorǵy stansıalarynyń qurylysy aıaqtalǵanǵa deıin Alataý aýdanynyń ákimdigi osy shaǵyn aýdanda assenızatorlyq mashınalardy paıdalanyp, septıkter men kanalızasıa júıelerin tazalaýdy qamtamasyz etedi.