Bıylǵy qarashada jeti shaǵynaýdanda uzyndyǵy 53 km astam 47 kóshedegi joldardy ortasha jóndeý aıaqtalady.
Sondaı-aq, Momyshuly kóshesindegi jaıaý júrginshiler ótkelderine 4 baǵdarsham ornatylyp jatyr, dep habarlaıdy Almaty-akshamy.kz
«Alataý aýdanyna alǵash barǵan kezimde, "Shańyraq-1" shaǵynaýdanynyń turǵyndary ortalyq Ótemisuly kóshesine jóndeý júrgizý týraly ótinish bildirgen bolatyn. Turǵyndardyń osy ótinishin eskere otyryp, Almaty qalasynyń ákimdigi ál-Farabı dańǵylyn jóndeýge josparlanǵan qarajattyń bir bóligin aldy. Bul qarajattardy magıstraldyq mańyzy bar Ótemisuly kóshesin (3,9 km) ortasha jóndeýge baǵyttaý týraly sheshim qabyldady. Jumystar bastalyp ta ketti, ony bıyl qyrkúıekte aıaqtaımyz dep otyrmyz», dedi búgin aýdan turǵyndarymen kezdesken megapolıs basshysy.
Sondaı-aq, Raıymbek dańǵylynda (Saın kóshesinen bastap Jýaly kóshesine deıin 4,6 km) ortasha jóndeý jumystaryn bastaldy. Tamyz aıynda Rysqulov dańǵylyndaǵy (Kýderın kóshesinen bastap Nemırovıch-Danchenko kóshesine deıin 1,7 km) asfált tósemin aýystyrýdy bastalady. Bul ýchaskeler osy jyldyń qarasha aıyna deıin tolyǵymen aıaqtalady.
Sonymen qatar, aǵymdaǵy jyldyń qarasha aıynda jeti shaǵynaýdanda uzyndyǵy 53 km astam 47 kóshedegi joldardy ortasha jóndeý aıaqtalady. Olar "Aqbulaq" (14,7 km), "Darhan" (5,4 km), "Saıaly" (1,7 km), "Uljan" (2,3 km), "Ójet" (1,1 km), "Kók-Qaınar" (1,2 km), 14-shi aýmaqta (15,5 km) ornalasqan.
Osy jyl qarashanyń ortasyna deıin "Alǵabas" shaǵynaýdanynda uzyndyǵy 10 km jańa jol qurylysyn aıaqtaý josparda. "Shańyraq-1" jáne "Shapaǵat" shaǵynaýdandarynda ortalyq sýmen jabdyqtaý jáne kanalızasıa jelileri tóselgennen keıin 32 km deıin jańa jol salynady.
«Qurmetti turǵyndar, shaǵynaýdandarda joldardy salý sýmen jabdyqtaý jáne kanalızasıa jelileri boıynsha qurylys jumystary aıaqtalǵannan keıin salynatynyn taǵy da eske salǵym keledi. Ótken kezdesýde turǵyndar "Alǵabas" shaǵynaýdany men Móńke bı kóshesine tıisti jol belgilerin ornatyp, jaıaý júrginshiler ótkelin uıymdastyrýǵa qatysty óz ótinishterin bildirgen bolatyn. Búginde bul jumystar oryndaldy», - dep esep berdi turǵyndarǵa Erbolat Dosaev.
Sondaı-aq, Momyshuly kóshesindegi jaıaý júrginshiler ótkelderine 4 baǵdarsham ornatylyp jatyr. Jumystar osy jyldyń tamyz aıynyń sońyna deıin aıaqtalady.
"Shapaǵat" shaǵynaýdanynda turǵyndardyń jaılylyǵy úshin jáne «Stroı sıtı» qurylys kesheniniń janyndaǵy zańsyz avtokólik turaqtaryn joıý maqsatynda trotýarlar saldyq. Búginde "Ójet" shaǵynaýdanyndaǵy barlyq tuıyq jáne tar kóshelerdegi jóndeý jumystary aıaqtaldy. "Terekti" shaǵynaýdanyndaǵy Jaǵaltaı kóshesindegi joldardy osy jyldyń qarasha aıynyń sońyna deıin jóndep bitiremiz», - dep atap ótti qala ákimi halyqpen kezdesýde.