Qazaqstanda qazan aıynyń alǵashqy jeksenbisinde ustazdardyń kásibı merekesi atalyp ótedi.
Bilim jáne ǵylym mınıstrligi Ustazdar kún qarsańynda «Ustazyńdy quttyqta» (Ustazyńdyquttyqta #Pozdravsvoegoýchıtelá), aksıasyn iske qosty, dep habarlaıdy Almaty-akshamy.kz.
Bul aksıanyń bastamashysy Bilim jáne ǵylym mınıstri Asqat Aımaǵambetov Instagram-daǵy óz paraqshasynda ustazdardy quttyqtaýǵa, olardyń mańyzdy da eleýli jumystaryna nazar aýdarýǵa shaqyryp post arnady.
«Ár adamnyń ómirinde onyń alǵashqy ustazy erekshe oryn alady. Alǵashqy ustazdyń bala ómirindegi róli, ásirese, búldirshinder bastaýysh synyptan 5-synypqa aýysqan kezde baıqalady. Meniń alǵashqy ustazym Lúbov Valentınovna Gomzeleva boldy. Ol adamnyń ádemi jazýy men ásem kúlkisi áli kúnge deıin esimde. Bastaýysh synyptarda oqyp júrgenimizde ózimizdi erekshe sezindik, muǵalimniń oqýshylarǵa degen qamqorlyǵy men súıispenshiligin kórip óstik. Synyptaǵy ár oqýshy muǵalimniń qoldaýy men mahabbatyn sezip, ózin erekshemin dep oılaýy — bul pedagog boıyndaǵy erekshe bir qasıet bolar», - dedi Aımaǵambetov.
Sonymen qatar mınıstr tarıh pániniń muǵalimderi Marat Isabekuly men Tynyshtyq Nurbekqyzynyń sabaqtary kezindegi qyzyqty sátterin eske aldy.
«Tarıh pániniń muǵalimderi Marat Isabekuly men Tynyshtyq Nurbekqyzynyń sabaqtary óte qyzyqty ótetin. Shetel tili muǵalimi Alla Vasılevnanyń esimi jadymda saqtalyp qaldy. Sondaı-aq orys tili pániniń muǵalimi Lúbov Ivanovna da esimde. Erekshe qatal jáne talapshyl muǵalim edi. Muǵalimimizdiń «qanatty sózderi» búgin bizdiń de sózdik qorymyzdan tabylyp jatady. Joǵary oqý ornynda oqyp júrgen kezdegi oqytýshylarym da keremet jandar boldy. Olar stýdentterdiń jeke tulǵa bolyp qalyptasýlaryna aıtarlyqtaı áser etti. Qazan aıynyń birinshi jeksenbisinde elimizde Muǵalimder kúni atap ótiledi. Kásibı merekege oraı Bilim jáne ǵylym mınıstrligi #Ustazyńdyquttyqta aksıasyn bastady. Barshańyzdy ustazdaryńyzdy quttyqtap, jyly lebizderińizdi bildirýge shaqyramyn», - dedi ol.