2021 jylǵy 19 tamyzda Abaı atyndaǵy QazUPÝ-da QR Parlamenti Májilisiniń depýtaty Juldyz Súleımenova ýnıversıtettiń profesor-oqytýshylar quramymen kezdesti, dep habarlaıdy almaty-akshamy.kz
Kezdesýge Abaı atyndaǵy QazUPÝ rektory Darhan Bilálov, Almaty qalasy máslıhatynyń depýtaty Raıhan Bólekbaeva, «Nur Otan» partıasy Almaty qalalyq fılıaly tóraǵasynyń orynbasary Qaırat Bısembaev jáne Almaty qalasy qoǵamdyq damý basqarmasy jastar men otbasyn turaqty damytý bóliminiń basshysy Orynbasar Qudaıbergenov jáne ýnıversıtet basshylyǵy qatysty.
İs-shara barysynda bilim jáne ǵylym salasyn damytýdyń ózekti máseleleri talqylandy: jańa mektepterdiń basshylaryn jáne olardyń oqý-tárbıe jumysy jónindegi orynbasarlaryn, ádiskerlerdi daıarlaý, pedagogıkalyq praktıkanyń jańa ádisterin qalyptastyrý, robototehnıka, STEM-bilim berýdi damytý, qalalyq jáne aýyldyq mektepter arasyndaǵy bilim berý sapasyndaǵy alshaqtyqty joıý, Abaı atyndaǵy QazUPÝ bazasynda mektepterdi basqarý jáne kóshbasshylyq boıynsha biliktilikti arttyrýdyń arnaıy kýrstaryn uıymdastyrý, Ýnıversıtettiń úzdik túlekterin sheteldik joǵary oqý oryndarynda oqytý, ınklúzıvti synyptardy ashý, olardyń negizinde bilim berý qajettilikteri bar oqýshylarǵa jaǵdaı jasaý jáne olarǵa qajetti psıhologıalyq qyzmet kórsetý.
Qazirgi tańda tárbıe máseleleri birinshi orynda bolǵandyqtan, tárbıe jumysymen aınalysatyn mektep kadrlaryn oqytý jáne qaıta daıarlaý pedagogıkalyq joǵary oqý oryndary arqyly júzege asyrylýy qajet ekeni aıtyldy. Sondaı-aq, kezdesýge qatysýshylar bilim berý salasyndaǵy ózekti máseleler boıynsha pikir almasty.
Darhan Bilálov mektepter úshin bilim berý kadrlary men kóshbasshylaryn daıarlaý máselelerin sheshýdiń mańyzdylyǵyn, ınklúzıvti bilim berý baǵdarlamalary boıynsha muǵalimderdi daıarlaýdy qamtamasyz etý, muǵalimderdiń biliktiligin arttyrý, mektep dırektorlaryn oqytý qajettiligin atap ótti. Rektor ýnıversıtettiń ınovasıalyq bilim berý baǵdarlamalaryn qurý baǵytyndaǵy kózqarasyn, profesor-oqytýshylar quramynyń, bilim berý mekemeleri muǵalimderiniń biliktiligin arttyrý múmkindikteri jáne QR joǵary bilim berý salasyn damytý baǵdarlamasyn iske asyrý týraly aıtyp berdi.
Bizdiń joǵary oqý ornynda shynymen de ǵylymı mektep pen myqty kadrlar bar. Mektep dırektorlaryn daıarlaý - bolashaǵy zor baǵyt. Abaı ýnıversıteti úshin elimizdiń birinshi joǵary oqý orny jáne pedagogıkalyq salanyń draıveri retinde otandyq bilim berýdi damytýdyń aýqymdy josparlaryn iske asyrýǵa óz úlesin qosý tek qurmetti ǵana emes, sonymen qatar jaýapty mindet.
Joǵary bilim berý salasyndaǵy kóshbasshylyqtyń halyqaralyq praktıkasy qarapaıym muǵalimderdiń jumysy, balalardy oqytý men tárbıeleý, sondaı-aq mekemeniń barlyq ınfraqurylymy baılanysty mektep basshylaryn daıyndaýǵa baǵyttalǵan. Jasyratyny joq, muǵalim kóshbasshylyq pozısıaǵa aýysqan kezde, ol kóbinese bilim berý salasyndaǵy menedjment máselelerinde daıyndyqtyń jetispeýshiligimen baılanysty qıyndyqtarǵa tap bolady.
Juldyz Súleımenova búgingi kúnniń basty mindeti - el mektepteri úshin sapaly muǵalimderdi daıyndaý ekenin atap ótti.
Jańa mektep dırektorlaryn ýnıversıtetterde sapaly bilim alǵan bilikti mamandardan irikteý kerek. Elimizdiń pedagogıkalyq joǵary oqý oryndarynyń kóshbasshysy Abaı atyndaǵy QazUPÝ osyndaı kadrlardy qaıta daıarlaý men biliktiligin arttyrýdy uıymdastyrýǵa belsendi qatysady dep senemiz, -dedi QR Parlamenti Májilisiniń depýtaty.
Abaı atyndaǵy QazUPÝ-dyń strategıa, sıfrlandyrý jáne ınternasıonaldandyrý jónindegi prorektory Aqtolqyn Qulsarıeva pedagogıkalyq kadrlardy daıarlaý máseleleri ýnıversıtettiń damý strategıasyna engizilgenin, jańa formasıadaǵy muǵalimderdi daıarlaý boıynsha birqatar iske asyrylyp jatqan jobalardy atap ótti.
Kezdesý qorytyndysy boıynsha partıa ókilderi men sharanyń basqa qatysýshylary Abaı atyndaǵy QazUPÝ-dy odan ári damytý maqsatynda birlesken is-sharalarǵa daıyn ekendikterin bildirdi.